Prezıdent Teleradıokesheni qyzmetkerleri «Taza Qazaqstan» aktsııasyna qatysty
ASTANA. KAZINFORM — Elordada «Taza Qazaqstan. Astana — tazalyq pen tártiptiń úlgisi» aktsııasy aıasynda jalpyqalalyq senbilik ótip jatyr. Ekologııalyq is-sharaǵa Prezıdent Teleradıokesheni qyzmetkerleri de belsendi qatysty.
Mekemeniń 150-den astam qyzmetkeri qalalyq ákimdik bólip bergen ýchaskeni — Uly dala dańǵylynan Kereı-Jánibek handar kóshesine deıin Nura-Esil arnasynyń jaǵalaýyn qoqystan tazalap shyqty.
Aıta keterligi, ekologııalyq aktsııa aıasynda qalany, nóser jáne aryq káriz jelilerin sanıtarlyq tazartý, kóshelerdi, trotýarlardy, oramishilik aýmaqtardy, qoǵamdyq keńistikter men aýlalardy tazalaý júrgizilip jatyr. Sondaı-aq jasyl jelekterdi kútip-baptaý jáne otyrǵyzý boıynsha maýsymdyq agrotehnıkalyq jumystar, saýda nysandaryna irgeles aýmaqtardy jınaý, ruqsat etilmegen qoqys úıindilerin joıý syndy is-sharalar da qolǵa alynǵan.
Tazalyq aktsııasy barysynda alty aýdanda 6 myńnan astam jasyl jelek otyrǵyzyldy.
Ekojoba aıasynda arnaıy taqyryptaǵy senbilikter, ekologııalyq sabaqtar, fleshmobtar, aqparattyq naýqandar jáne abattandyrý konkýrstary uıymdastyryldy. Qazirgi ýaqytta elordada «Taza Qazaqstan» onlaın-platformasy arqyly qala turǵyndarynan ótinimderdi qabyldaý belsendi júrgizilip jatyr. Ótinimderdiń negizgi sanattaryna aýmaqtardy abattandyrý, jaryqtandyrý, joldardy jóndeý, kógaldandyrý, ruqsat etilmegen polıgondardy joıý máseleleri kiredi. Barlyq eskertý ýaqytyly óńdeledi, bul turǵyndarǵa qolaısyzdyqty azaıtýǵa múmkindik beredi.
2024 jylǵy sáýirde Memleket basshysy Qasym-Jomart Toqaevtyń «Taza Qazaqstan» bastamasy aıasynda 2024 jyly keshendi sharalar qabyldandy. Nátıjesinde 2019-2023 jyldary orta eseppen 62 ekologııalyq aktsııa ótkizilse, 2024 jyly bul kórsetkish 183-ke jetti. Eger ótken 5 jylda aktsııalarǵa 2,4 mln adam qatysyp, 900 myń tonna qoqys jınalyp, shamamen 2,5 mln jasyl jelek otyrǵyzylsa, 2024 jyly ekologııalyq aktsııalarǵa 6,2 mln adam qatysyp, 1,1 mln tonna qoqys jınaldy, shamamen 1,6 mıllıon aǵash egildi.
Ruqsat etilmegen qoqys alańdary aıtarlyqtaı azaıdy. Eger 2018 jyly 8,7 myń qoqys orny anyqtalyp, onyń 57 paıyzy joıylsa, 2024 jyly 4,8 myńǵa jýyq qoqys alańy belgili bolyp, 93 paıyzy joıyldy.
Bıyl «Taza Qazaqstan» aıasyndaǵy ekologııalyq is-sharalar naýryz aıynan bastap ońtústik jáne batys óńirlerde qolǵa alyndy. Búginge deıin uıymdastyrylǵan 11 tazalyq is-sharasyna 223 myńnan astam adam qatysty. Onyń ishinde 11,6 myńnan astamy — eriktiler. Nátıjesinde 7,6 myń tonna qoqys jınalyp, 385 myń gektar aýmaq tazartyldy. Shamamen 74,1 myń jasyl jelek otyrǵyzyldy.
Prezıdent ózi bastamashy bolǵan ekologııalyq aktsııaǵa turaqty qatysyp kele jatyr. Máselen, ótken jylǵy is-shara barysynda Memleket basshysy qoǵamda ekologııa mádenıetin qalyptastyrý, tabıǵatty aıalaý mańyzdy ekenin atap ótken-di.
— Shyn máninde, elimizdi kógaldandyrý, abattandyrý — úlken memlekettik mańyzy bar is. Bul búgin shyǵyp, erteń umytyp ketetin birrettik naýqan emes. Atalǵan jumys turaqty túrde júrgiziledi. Týǵan jerimizdi taza ustaýymyz kerek. Bul — jalpyulttyq másele. Qazaqstanymyz taza bolýy qajet. Las elge qonaq retinde, ınvestor retinde eshkim kelmeıdi. Biraq, eń aldymen, Qazaqstannyń taza, kórikti bolǵany biz úshin, ıaǵnı halyq úshin kerek, — degen edi Qasym-Jomart Toqaev.
Osyǵan deıin Memlekettik keńesshi Erlan Qarın Ulttyq quryltaıdyń jáne Jastar saıasaty jónindegi keńestiń bir top múshelerimen birge aǵash otyrǵyzǵanyn jazǵanbyz.