Prezıdent Teleradıokesheni Qytaıdaǵy medıa forýmǵa qatysty
ASTANA. KAZINFORM — Prezıdent Teleradıokesheni bıyl 3 qarashada Qytaıdyń Fýtszıan provıntsııasyndaǵy Fýchjoý qalasynda ótken «Bir beldeý - bir jol» BAQ yntymaqtastyǵy forýmyna qatysty, dep habarlaıdy Kazinform agenttiginiń tilshisi.
Forýmdy «Jenmın jıbao» gazeti men Fýtszıan provıntsııasynyń úkimeti uıymdastyrdy. Oǵan álemniń 100 elinen kelgen 182 BAQ pen uıym ókilderi jınaldy.
«Bir beldeý, bir jol» baǵytyndaǵy ortaq maqsattar men kelisim» taqyrybyna arnalǵan jıynda halyqtar arasyndaǵy ózara túsinistikti nyǵaıtý, kásibı baılanysty damytý jáne «Bir beldeý - bir jol» bastamasyn aqparattyq turǵydan jarııa etýdegi BAQ-tyń róline erekshe nazar aýdaryldy.
Forýmda Prezıdent Teleradıokesheniniń quramyna kiretin «Kazinform» HAA basqarýshy dırektory Dana Rysmuhamedova sóz sóılep, QHR tóraǵasy Sı Tszınpınniń «Bir beldeý, bir jol» bastamasyn alǵash ret 2013 jyly Astanada tanystyrǵanyn atap ótti.
Prezıdent Teleradıokesheni men «Jenmın jıbao» gazetiniń seriktestigine 2024 jyly jasalǵan yntymaqtastyq týraly memorandým negiz bolǵan. Qujat aqparat almasýdy keńeıtýge, Qazaqstan men Qytaı, ǵylym, mádenıet, ekonomıka salalaryndaǵy jetistikter jaıly, óńirlerdiń damýy jáne eki halyqtyń tynys-tirshiligi týraly birlesken materıaldar daıyndaýǵa baǵyttalǵan.
2025 jylǵy mamyrda Astanada «Jenmın jıbao» gazetiniń bastamasymen ótken «Ortalyq Azııa – Qytaı» halyqaralyq medıaforýmy ekijaqty yntymaqtastyqty damytýǵa tyń serpin berdi. Prezıdent Teleradıokesheni óńir elderiniń BAQ ókilderin biriktirgen bul jıynnyń teń uıymdastyrýshysy boldy.
Forým aıasynda Prezıdenttiń Teleradıokesheni múshe «Bir beldeý, bir jol» aqparattyq jelisi (Belt and Road News Network, BRNN) keńesiniń tórtinshi otyrysy da ótti.
Keńes jumysyna qatysý qazaqstandyq taraptyń sheteldik jetekshi redaktsııalarmen kásibı baılanysyn nyǵaıtyp, halyqaralyq aqparat almasý aıasyn keńeıtýge jáne Qazaqstannyń aqparattyq kún tártibin álemge tanytýǵa múmkindik beredi.
«Bir beldeý, bir jol» aqparattyq jelisi keńesiniń otyrysynda Prezıdent Teleradıokesheniniń ókilderi qatysýshy elderdiń BAQ arasynda jańalyqtar, foto jáne beınematerıaldar almasýdy turaqty jolǵa qoıýdy, birlesken taqyryptyq jobalardy iske qosýdy, sondaı-aq taǵylymdamalar, semınarlar men sheberlik sabaqtaryn uıymdastyrý arqyly jýrnalısterdiń kásibı baılanysyn damytýdy usyndy.
Aıta keteıik, «Bir beldeý - bir jol» BAQ yntymaqtastyǵy forýmy 2014 jyldan beri ótkizilip keledi. Ol túrli elderdiń buqaralyq aqparat quraldary arasyndaǵy dıalogty damytýǵa arnalǵan halyqaralyq alań sanalady.
Buǵan deıin Prezıdent Teleradıokesheni men aǵylshyn tilindegi eń kóne The Korea Times basylymy medıaseriktestikti damytýǵa ýaǵdalasqanyn habarlaǵan bolatynbyz.
