Prezıdent Teleradıokesheni delegatsııasy Beıjińdegi VII Dúnıejúzilik medıasammıtke qatysyp jatyr
ASTANA. KAZINFORM — QR Prezıdentiniń Teleradıokesheni delegatsııasy 5-9 qarasha aralyǵynda Beıjińde ótip jatqan VII Dúnıejúzilik medıasammıtke qatysyp jatyr.
«Sınhýa» aqparat agenttiginiń qurylǵanyna 95 jyl tolýyna oraı uıymdastyrylǵan forým «Zııatkerlik transformatsııa jaǵdaıyndaǵy BAQ mıssııasy jáne birlesken is-qımyl» taqyrybyna arnalǵan.
Sammıt jumysyna álemniń 112 elinen 330-ǵa jýyq buqaralyq aqparat quralynyń, taldaý ortalyqtary men halyqaralyq uıymdardyń 500-ge jýyq ókili qatysyp jatyr.
Prezıdent Teleradıokesheniniń mereıtoılyq is-sharaǵa qatysýy «Sınhýa» agenttigimen kásibı áriptestikti odan ári damytýǵa múmkindik beredi. Bul yntymaqtastyq tájirıbe men kontent almasýdy, mańyzdy jańalyqtar men oqıǵalardy ózara aqparattyq súıemeldeýdi, sondaı-aq birlesken shyǵarmashylyq jobalardy júzege asyrýdy qamtıdy.
2025 jylǵy maýsymda Prezıdent Teleradıokesheniniń qoldaýymen «Sınhýa» agenttigi uıymdastyrǵan «Qytaı — Ortalyq Azııa» aqparat agenttikteri forýmynda medıauıymdar ózara yntymaqtastyq týraly memorandýmǵa qol qoıǵan edi. Kelisim aıasynda taraptar mýltımedıalyq jobalardy birlesip júzege asyrýdy, aqparat almasýdyń jańa joldaryn damytýdy jáne qazaqstandyq ári halyqaralyq aýdıtorııaǵa arnalǵan kontent taratýdy kózdeıdi.
Sol kezde aqparat almasý salasyndaǵy yntymaqtastyqtyń basym baǵyttaryn aıqyndaıtyn strategııalyq qujat — Astana konsensýsy qabyldandy. Bul qujat óńir elderi men Qytaı arasyndaǵy tsıfrlyq tehnologııalar, aqparat jáne IT salalaryndaǵy ózara yqpaldastyqtyń negizin qalap, uzaqmerzimdi áriptestiktiń negizgi baǵyttaryn belgiledi.
Qytaıdyń buqaralyq aqparat quraldarymen baılanysty damytý — Prezıdent Teleradıokesheniniń Azııa elderinde biryńǵaı áriptestik jelisin qalyptastyrý baǵdarlamasynyń bir bóligi. Osy baǵyttaǵy yntymaqtastyq týraly kelisimder Japonııa, Koreıa, Vetnam, Úndistan, Pákistan jáne Eýrazııanyń basqa da elderindegi medıakompanııalarmen jasalǵan.
QR Prezıdentiniń Teleradıokesheni — medıaónimder ázirleýden bastap, olardy túrli platformalar men aqparat taratý arnalary arqyly aýdıtorııaǵa jetkizýge deıingi tolyq óndiristik tsıkldy qamtıtyn elimizdegi iri medıakompanııalardyń biri.
Kompanııa quramyna qazaqstandyq aýdıtorııaǵa arnalǵan Jibek Joly telearnasy men attas radıostantsııa, halyqaralyq Silk Way, Silk Way Cinema jáne Silk Way Prime telearnalary, «QazAqparat» halyqaralyq aqparat agenttigi, Derekti kıno ortalyǵy jáne TRKLAB tsıfrlyq bólimshesi kiredi.
«Sınhýa» aqparat agenttigi — Qytaıdyń resmı memlekettik aqparat agenttigi ári álemdegi eń iri jáne yqpaldy aqparat quraldarynyń biri. 1931 jyly qurylǵan agenttik 13 tilde aqparat taratady. Álemniń túkpir-túkpirinde 180-ge jýyq tilshiler qosyny jumys isteıdi.
Aıta keteıik, búgin Tájikstan Prezıdenti Emomalı Rahmonnyń Astanaǵa resmı sapary aıasynda Qazaqstan Prezıdentiniń Teleradıokesheni men Tájikstannyń medıa qurylymdary arasynda ózara túsinistik pen yntymaqtastyq týraly memorandýmdarǵa qol qoıyldy.
