Prezıdent Teleradıokesheni «Bolashaq oıyndary–2026» týrnıriniń televızııalyq túsirilimin jasaıdy
ASTANA. KAZINFORM – Astanada 29 shilde men 9 tamyz aralyǵynda ótetin halyqaralyq «Bolashaq oıyndary–2026» mýltısporttyq týrnıriniń televızııalyq kórsetilimin qamtamasyz etýge Prezıdent Teleradıokesheniniń 150-ge jýyq mamany jumyldyrylady.
Prezıdent Teleradıokesheni týrnırdiń ashylý saltanatyn, sondaı-aq Qazaqstan jeńil atletıkalyq sport kesheninde ótetin úsh fıdjıtal dıstsıplınasy boıynsha jarystardyń televızııalyq óndirisin júzege asyrady. Munda Phygital Basketball (29 shilde – 3 tamyz), Phygital Football (4-9 tamyz) jáne Phygital Fighting (8 tamyz) týrnırleri ótedi.
Ol úshin kópkameraly túsirilimge arnalǵan zamanaýı jabdyqpen jabdyqtalǵan jyljymaly televızııalyq stantsııalar paıdalanylady. Olar týrnırdiń negizgi is-sharalaryn joǵary sapada túsirip, televızııalyq óndiris pen translıatsııany qamtamasyz etedi.
Qazirgi ýaqytta jarysqa daıyndyq jumystary sońǵy kezeńge shyqty. Jyljymaly televızııalyq stantsııalar sport nysandaryna ornalastyrylyp, jabdyqtar men sıgnal taratý jelilerine tehnıkalyq tekserýler júrgizildi. Qazir bas repetıtsııalar ótip jatyr.
«Bolashaq oıyndarynyń» ashylý saltanatyn túsirýge 24 televızııalyq kamera tartylady. Sonymen qatar uıymdastyrýshylar túrli rakýrstan túsirilim júrgizý úshin trostyq kamera júıesi men operatorlyq kran sııaqty qosymsha arnaıy jabdyq ornatty.
Televızııalyq óndiriske rejısserler, ınjenerler, operatorlar, dybys rejısserleri, jaryq qoıý mamandary jáne ózge de tehnıkalyq qyzmetkerler qatysady.
Týrnırdiń ashylý saltanaty men negizgi jarystaryn Jibek Joly jáne Silk Way telearnalary tikeleı efırde kórsetedi.
«Bolashaq oıyndary – 2026» dástúrli sport pen zamanaýı tsıfrlyq tehnologııalardy biriktiredi. Jarysqa halyqaralyq klýbtar quramynda álemniń ondaǵan elinen 800-deı sportshy qatysady dep kútilip otyr. Týrnırdiń jalpy júlde qory 4 mln 650 myń AQSh dollaryn quraıdy.
Eske salaıyq, 2024 jyldyń aqpan aıynda Qazan qalasynda ótken «Bolashaq oıyndarynda» Memleket basshysy Qasym-Jomart Toqaev kelesi týrnırdi Qazaqstanda ótkizýdi usynǵan bolatyn. Sol jyldyń qazan aıynda Qazaqstan Perý men Chılıdi basyp ozyp, halyqaralyq irikteý qorytyndysy boıynsha jarysty qabyldaıtyn el bolyp tańdaldy.
«Bolashaq oıyndary – 2026» týrnırine bıletterdi satý 20 mamyrda bastaldy. 21 shildede Qazaqstannyń Týrızm jáne sport mınıstrligi jarystardyń resmı kestesin tanystyrdy. Al 25 shildede Astana alǵashqy qatysýshylardy qarsy aldy. 27 shildede elordaǵa Dota 2 áleminiń alpaýyt komandalary Xtreme Gaming jáne Vici Gaming keldi. Bul ujymdar The International týrnıriniń fınalısteri, halyqaralyq jarystardyń jeńimpazdary sanalady.
Aıta keteıik, «Bolashaq oıyndaryna» 20 myń týrıst keletini habarlandy.
