Prezıdent Teleradıokesheni 30 jylda 1000-nan astam derekti fılm túsirdi
ASTANA. KAZINFORM — Bul týraly Derekti kıno ortalyǵynyń bas prodıýseri Ádilbek Qulaman Jibek Joly radıosyna bergen suhbatynda aıtty.
Onyń aıtýynsha, ortalyqtyń jumysy tek derekti fılmder túsirýmen shektelmeıdi. Sonymen qatar beınerolıkter men túrli arnaıy jobalar da daıyndalady.
— 30 jylda 1000-nan astam derekti fılm túsirdik. Derekti fılmderdi daıyndaý bar, odan bólek beınerolıkter, arnaıy jobalar, barlyǵy da bizdiń jumysymyzǵa kiredi. Árbir jasaǵan jumysymyzǵa tyńǵylyqty daıyndalý úshin biz aldyn ala ıdeıany ujym bolyp oılastyramyz. Odan keıin onyń kontentti daıyndaý kezindegi ártúrli kezeńderi bar. Stsenarıı jazý, montaj jasaý, dybyspen árleý — munyń barlyǵy úlken ujymnyń eńbegi. Sondyqtan osy jumystyń bárin uıymdastyrýda prodıýserdiń róli óte mańyzdy. Ideıa týǵan sátten bastap joba tolyq aıaqtalǵanǵa deıin prodıýserdiń jumysy jalǵasady, — dedi Ádilbek Qulaman.
Ol derekti fılmniń sapaly shyǵýy shyǵarmashylyq toptyń úılesimdi jumysyna tikeleı baılanysty ekenin atap ótti. Prodıýserdiń mindeti ıdeıany júzege asyrýdyń barlyq kezeńin úılestirip, túsirilimnen bastap sońǵy montajǵa deıingi úderisti baqylaýdy qamtıdy.
Buǵan deıin Dımashtyń Nıý-Iorktegi tarıhı kontserti jaıly derekti fılmi kórermenge jol tartatyny jaıly jazdyq.
