Prezıdent tazy men tóbetti ulttyq brend retinde keńinen nasıhattaý jóninde tapsyrma berdi

ASTANA. KAZINFORM - Memleket basshysy Qasym-Jomart Toqaev World Dog Show 2025 dúnıejúzilik kórmesine qatysyp, halyqaralyq arenada laıyqty baǵasyn alǵan qazaqy tazyny ulttyq brend, mádenıetimizdiń ajyramas bólshegi retinde halyqaralyq deńgeıde tolyq tanytý ortaq mindet ekenine nazar aýdardy.

Bul týralybúgin óziniń Telegram arnasynda Qazaqstan Prezıdentiniń keńesshisi — baspasóz hatshysy Rýslan Jeldibaı jazdy.

Atap aıtqanda, tazy tuqymyn damytý jáne biregeı qasıetterin saqtaý, júıeli ǵylymı-zertteý jumystaryn júrgizý, halyqaralyq kórmelerge turaqty qatysý sııaqty baǵyttardan turatyn bul iske Qazaqstan kınologtar odaǵymen qatar memlekettik organdar da belsendi atsalysýǵa tıis.

Prezıdent Іs basqarmasy, Ekologııa jáne tabıǵı resýrstar, Ǵylym jáne joǵary bilim, Aýyl sharýashylyǵy, Syrtqy ister mınıstrlikteri jáne basqa da quzyrly organdar, sondaı-aq jergilikti ákimdikter birlesken júıeli jospar aıasynda tıisti uıymdastyrý sharalaryn qolǵa alýy kerek.

Qasym-Jomart Toqaev tóbet tuqymyn da erekshe qamqorlyqqa alyp, memlekettik organdardyń qoldaýymen dál osy aýqymda jumys atqarý mindetin júktedi.

Atalǵan másele Prezıdent Ákimshiliginiń udaıy baqylaýynda bolady.

Aıta keteıik, osyǵan deıin Prezıdent Qazaqstan kınologtar odaǵyn qazaq tazysynyń halyqaralyq deńgeıdegi jetistigimen quttyqtady.