Prezıdent Tájikstan Madjlısı Olı Madjlısı mıllı tóraǵasyn qabyldady
ASTANA. KAZINFORM – Memleket basshysy Tájikstan Madjlısı Olı Madjlısı mıllı tóraǵasy Rýstamı Emomalıdi qabyldady. Bul týraly Aqordanyń baspasóz qyzmeti habarlady.
Kezdesýde Prezıdent Qasym-Jomart Toqaev pen Tájikstan Madjlısı Olı Madjlısı mıllı tóraǵasy Rýstamı Emomalı qazaq-tájik strategııalyq seriktestigi jáne odaqtastyq qatynastaryn parlamentaralyq baılanystardy damytý turǵysynan talqylady.
Memleket basshysy ekijaqty yntymaqtastyqtyń damý qarqynyna joǵary baǵa berdi. Sondaı-aq Rýstamı Emomalıdiń sapary Qazaqstan men Tájikstannyń ózara yqpaldastyǵyn odan ári nyǵaıtýda mańyzdy ekenine toqtaldy. Tájikstan Parlamenti joǵary palatasynyń spıkeri qonaqjaılyq tanytqany úshin Memleket basshysyna alǵys aıtyp, Tájikstan Prezıdenti Emomalı Rahmonnyń sálemin jetkizdi.
Rýstamı Emomalı Qazaqstan Tájikstannyń senimdi strategııalyq seriktesi jáne odaqtasy ekenin atap ótti. Sonymen qatar Memleket basshysyn Qazaqstan Respýblıkasy Konstıtýtsııasynyń 30 jyldyǵymen quttyqtap, halyqtarymyzdyń ıgiligi úshin eki eldiń parlamentteri arasynda konstrýktıvti jáne iskerlik baılanystar jolǵa qoıylǵanyna nazar aýdardy.
Kezdesýde saýda-ekonomıkalyq yqpaldastyqty, parlamentaralyq dıplomatııa men sý salasyndaǵy baılanysty arttyrýdyń ózekti máseleleri talqylandy.
Sonymen qatar ekijaqty qarym-qatynas dostyq jáne ózara qoldaý rýhynda damyp kele jatqany aıtyldy.
Aıta keteıik, buǵan deıin Memleket basshysy QHR-diń Qazaqstandaǵy elshisi Han Chýnlındi qabyldady.