Prezıdent Taza Qazaqstannyń túpki máni qoǵamdyq sanany jańǵyrtý ekenin atap ótti
ASTANA.KAZINFORM — ️Memleket basshysy «Taza Qazaqstan» jalpyulttyq jobasynyń túpki máni qoǵamdyq sanany jańǵyrtý ekenin atap ótti. Bul týraly Aqordanyń baspasóz qyzmeti habarlady.
— Qoǵamda tazalyqty saqtaý, qorshaǵan ortany qorǵaý mádenıetin ornyqtyrýdyń mán-mańyzy zor.
Osy rette «Taza Qazaqstan» jalpyulttyq jobasyn aıryqsha atap ótken jón. Bul bastama qala men aýyldy abattandyrý jumysymen shektelmeıdi. Onyń túpki máni — qoǵamdyq sanany jańǵyrtý.
Sol arqyly azamattarymyzdy qasterli Otanymyz — Qazaqstannyń taǵdyryna beı-jaı qaramaı, bolashaqtyń irgesin birge qalaýǵa shaqyrý, — dedi Prezıdent.
Memleket basshysy jahandyq básekege qabiletti elge aınalǵanymyzdy atap ótti.
— Jaýapkershilik, ádildik, ózara qurmet bar jerde ǵana ósip-órkendeýge, damýǵa jol ashylady. Bul — órkenıetti memleketter men halyqtardyń barlyǵyna ortaq ustanym. Osy qundylyqtar jańa Halyq Konstıtýtsııasyna arqaý bolyp otyr.
Biz damýdyń dańǵyl jolyna túsip, jahandyq básekege qabiletti elge aınaldyq. Naqty jetistikterimiz bar. Bul — eń aldymen, sapaly adam kapıtaly, — dedi ol.
Aıta ketelik Quryltaı saılaýy tamyz aıynda ótedi.
