Prezıdent: «Taza Qazaqstan» – ár adamnyń kúndelikti daǵdysy, ómir salty bolýy qajet
BÝRABAI. KAZINFORM – Memleket basshysy Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda «Taza Qazaqstan» bastamasy týraly aıtty.
− Tazalyq máselesi árdaıym nazarda bolýǵa tıis. Byltyrdan beri elimizde «Taza Qazaqstan» aktsııasy júrip jatyr. Bastamaǵa azamattar jappaı qoldaý bildirdi. Aktsııa jalpyulttyq sıpatqa ıe boldy. Kún jylynyp keledi, endi jurt senbilikke shyǵyp, aınalasyn tazalaıdy. Bul – óte durys. Men buǵan deıin de aıttym, «Taza Qazaqstan» – jaı naýqan emes. Bul ár adamnyń jáne barsha halyqtyń kúndelikti daǵdysy, ómir salty bolýy qajet, − dedi Qasym-Jomart Toqaev.
Aıta keteıik, Prezıdent bastamasymen qolǵa alynǵan «Taza Qazaqstan» ekologııalyq naýqanyna byltyr 2,4 mıllıon adam qatysyp, 2,5 mıllıon kóshet otyrǵyzyldy.
Premer-mınıstr Oljas Bektenov Úkimet otyrysynda «Taza Qazaqstan» ekologııalyq bastamasy tıimdiligin kórsetkenin aıtty.
Sondaı-aq, elimizde 2024-2029 jyldarǵa arnalǵan «Taza Qazaqstan» ekologııalyq mádenıetin damytý tujyrymdamasy bekitiledi.