Prezıdent: «Taza Qazaqstan» aktsııasy jalpyulttyq ıdeologııaǵa aınalyp keledi
ASTANA. KAZINFORM — Qasym-Jomart Toqaev COP17 aıasyndaǵy Bıoalýantúrlilik boıynsha kóshbasshylar sammıtinde sóz sóılep, jer kólemi boıynsha álemde toǵyzynshy oryn alatyn Qazaqstan biregeı bıoalýantúrliligimen erekshelenetinin aıtty, dep habarlaıdy Aqordanyń baspasóz qyzmeti.
— Tabıǵattyń osy syıyn saqtaý — jurt aldyndaǵy boryshymyz, sondaı-aq halyqaralyq qoǵamdastyq aldyndaǵy jaýapkershiligimiz. Bul qundylyqtar Qazaqstannyń jańa Konstıtýtsııasynda aıqyn kórinis tapty. El tarıhynda alǵash ret joǵary ekologııalyq mádenıet qalyptastyrý memlekettiliktiń negizin quraıtyn qaǵıdattardyń biri retinde Ata zańymyzda bekitildi. Endi azamattar tabıǵat pen onyń resýrstaryn kóziniń qarashyǵyndaı saqtaýǵa mindetti. Budan bólek, azamattardyń ómiri men densaýlyǵy úshin qolaıly qorshaǵan ortany qorǵaý memlekettiń mańyzdy maqsattarynyń biri retinde belgilendi. Tabıǵat baılyǵyn saqtaý ekonomıkalyq órleýmen qatar júrýi kerek ekenine senimdimiz. «Taza Qazaqstan» jalpyulttyq aktsııasy osy qundylyqtardy arqaý etken. Bul qozǵalys qarapaıym ekologııalyq tazalyq aýqymynan shyǵyp ketti. Onyń azamattardyń dúnıetanymy men ómir saltyna yqpal etetin jalpyulttyq ıdeologııaǵa aınalyp kele jatqany qýantady, — dedi Prezıdent.
Buǵan deıin Prezıdent Qasym-Jomart Toqaev COP17 aıasyndaǵy Bıoalýantúrlilik boıynsha kóshbasshylar sammıtine qatysý úshin Erevandaǵy «Meridian Expo and Event» ortalyǵyna barǵanyn jazǵan edik.
