Prezıdent: Taıaýda qurylatyn Ulttyq júk tasymaldaýshy áýe kompanııasynyń qyzmetine jan-jaqty qoldaý qajet

ASTANA. KAZINFORM — Qasym-Jomart Toqaev taıaýda elimizde qurylatyn Ulttyq júk tasymaldaýshy áýe kompanııasynyń qyzmetin jan-jaqty qoldaý qajet ekenin málimdedi. Bul týraly Memleket basshysy óńirlik júk avıahabtaryn damytý jóninde keńeste aıtty.

– Otandyq júk tasymaly kompanııalaryn qoldaýdyń aldaǵy úsh-bes jylǵa arnalǵan naqty sharalar jıyntyǵyn ázirleý qajet. Basty maqsat – kompanııalardy qosylǵan qundy qurýǵa yntalandyra otyryp, mýltımodaldyq logıstıkany damytý. Áýe kemeleri flotyn órkendetý tranzıttik áýe jelisin qalyptastyrýdyń mańyzdy bóligi sanalady, – dedi Prezıdent.

Memleket basshysy elimizde júk tasymaldaıtyn ushaqtardyń tapshylyǵyna toqtaldy.

– Úkimet qurastyrylǵanyna 25 jyldan asqan júk ushaqtaryna qoıylǵan shekteýdi alyp tastaý máselesin muqııat qarastyrýy kerek. AQSh-taǵy FedEx áýe kompanııasy ushaqtarynyń shyǵarylǵanyna orta eseppen – 28 jyl. UPS kompanııasynda bul kórsetkish 30 jyl bolsa, Ulybrıtanııanyń One Air áýe kompanııasynda 33 jyldy quraıdy. Mundaı mysaldar jetkilikti, – dedi Prezıdent.