Prezıdent: Taıaý Shyǵystaǵy jaǵdaı boıynsha kelisimge qol qoıylýyn quptaımyz
ASTANA. KAZINFORM – Memleket basshysy forýmda sóılegen sózinde Qazaqstannyń Ibrahım kelisimderine qosylý jónindegi sheshimi atalǵan aımaqtaǵy ahýaldy turaqtandyrýǵa úles qosý nıetinen týyndap otyrǵanyn aıtty.
Memleket basshysy ózge óńirlerdegi qaqtyǵysty retteýge qatysty pikir bildirdi.
– Taıaý Shyǵystaǵy jaǵdaı boıynsha kelisimge qol qoıylýyn quptaımyz. Qazaqstannyń Ibrahım kelisimderine qosylý jónindegi sheshimi atalǵan aımaqtaǵy ahýaldy turaqtandyrýǵa úles qosý nıetinen týyndap otyr. Áıtse de Qazaqstan uzaqqa sozylǵan áskerı-saıası daǵdarysty túbegeıli retteýdiń mańyzdy faktory retinde egemen Palestına memleketin qurý ustanymyn jaqtaıdy. Ázerbaıjan men Armenııa beıbitshilik týraly birlesken deklaratsııaǵa qol qoıdy. Biz muny tarıhı sheshim dep sanaımyz. Óıtkeni osy arqyly atalǵan aımaqta jáne odan tysqary jerlerde san qyrly yntymaqtastyqqa keńinen jol ashylady. Ońtústik Kavkazdaǵy turaqtylyqqa kepildik beretin tolyq formatty beıbit kelisimshart taıaý arada jasalady dep úmittenemiz, - dedi ol.
Eske sala keteıik, buǵan deıin Qazaqstan Ýkraınadaǵy qaqtyǵysty retteý boıynsha kelissózdiń jandanýyna qoldaý bildiretinin jazǵanbyz.