Prezıdent Taıaý Shyǵystyń bitimge kelý týraly kelisimin quptaıdy
ASTANA.KAZINFORM — Prezıdent Qasym-Jomart Toqaev Pákistan Premer-mınıstri Shahbaz Sharıf pen Pákistan Qarýly kúshteriniń bas qolbasshysy, feldmarshal Asım Mýnırdiń araaǵaıyndyǵy arqyly Taıaý Shyǵystaǵy soǵysty tolyq toqtatý jáne bitimge kelý týraly kelisimge qol jetkizilýin quptaıdy. Bul týraly QR Prezıdentiniń keńesshisi — baspasóz hatshysy Aıbek Smadııarov málim etti.
— Bul kelisim AQSh Prezıdenti Donald Tramptyń jáne Irannyń joǵarǵy basshylyǵynyń, sondaı-aq áskerı qaqtyǵysqa qatysqan elderdiń izgi nıeti men parasattylyǵynyń arqasynda múmkin boldy. Memleket basshysy álemdik saýdanyń damýyna jáne barlyq memlekettiń ekonomıkalyq órkendeýine jaǵdaı jasaý maqsatynda qol jetkizilgen bitimgershilik kelisimniń uzaq merzimdi sıpatqa ıe bolatynyna úmit bildirdi, — delingen habarlamada.
Eske sala keteıik, buǵan deıin Taıaý Shyǵystaǵy shıelenisti dıplomatııalyq jolmen retteýge baǵyttalǵan mańyzdy qadam jasalǵanyn jazdyq. AQSh prezıdenti Donald Tramp Iranǵa soqqylardy ýaqytsha toqtatýǵa daıyn ekenin málimdegennen keıin, resmı Tegeran eki aptalyq bitim sharttaryn qabyldady. Taraptar arasyndaǵy kelissózder juma kúni Islamabadta bastalmaq.
Amerıka Qurama Shtattary Irannyń azamattyq ınfraqurylymyna yqtımal soqqy jasaýdy eki aptaǵa keıinge qaldyrdy.
