Taý-ken salasynda joǵary tehnologııalyq ónim shyǵaratyn úsh kásiporyn iske qosý tapsyryldy
ASTANA. KAZINFORM – Aldaǵy úsh jyl ishinde taý-ken salasynda joǵary tehnologııalyq ónim shyǵaratyn keminde úsh kásiporyndy iske qosýǵa tıispiz. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Taý-ken metallýrgııasy qashanda Qazaqstannyń jańa ındýstrıaldy qalybynyń senimdi tiregi bolyp keledi. Onyń el ekonomıkasyndaǵy úlesi — 8 paıyz. Biraq salanyń damý áleýeti zor. Ásirese, tereń óńdeletin ónimderdi shyǵarýǵa mol múmkindigi bar. Jahandyq úderisterge sáıkes, sırek kezdesetin metaldardyń jáne aıryqsha qajet basqa da materıaldardyń mańyzy arta tústi. Bul saladaǵy álemdik óndirister men saýda-sattyqtyń jańa jelisinde óz ornyn nyqtap alýyna Qazaqstannyń tolyq múmkindigi bar. Biz aldaǵy úsh jyl ishinde taý-ken salasynda joǵary tehnologııalyq ónim shyǵaratyn keminde úsh kásiporyndy iske qosýǵa tıispiz, — dedi Memleket basshysy.
Sondaı-aq, Prezıdent Úkimet kómirsýtegi shıkizatyn tereń óńdeıtin birqatar ozyq jobany júzege asyrýy qajettigin basa aıtty.
— Atyraýda iri gaz-hımııa kesheniniń qurylysy bastaldy. Pavlodarda suıytylǵan gazdy tereń óńdeýge arnalǵan joba qolǵa alyndy. Osy kásiporyndardyń der kezinde iske qosylýyn qamtamasyz etý kerek. Іlespe gaz ben suıytylǵan munaı gazyn qajetke jaratý máselesin túbegeıli qaıta qaraǵan jón. Ony tolyqqandy ekonomıkalyq resýrsqa aınaldyrý qajet. Investorlar jobalardy júzege asyrǵan kezde gaz shıkizatynan tapshylyq kórip otyr. Sondyqtan, bul máseleni de sheshý joldaryn tabýymyz kerek, ınvestorlardy uzaq ýaqyt gazben qamtamasyz etýge naqty kepildik beretin jańa tásilder oılastyrǵan jón. Jobanyń bárin der kezinde iske asyryp, ekonomıkany tsıfrlyq turǵydan jańǵyrtý úshin elektr energııasy jetkilikti kólemde bolýy qajet, — dedi Qasym-Jomart Toqaev.
Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.