Memleket basshysy: tártipsizdik pen zańsyzdyqqa jol berýge bolmaıdy

ASTANA. KAZINFORM  — Prezıdent Bas prokýratýrada jıyn ótkizdi. Bul týraly Aqordanyń baspasóz qyzmeti habarlady. 

Memleket basshysy azamattarǵa destrýktıvti kontentti taratýdyń quqyqtyq saldary jóninde únemi túsindirý jumystaryn júrgizgen jón ekenin aıtty.

— Tehnologııanyń qarqyndy damýy aqparattyq keńistiktiń túbegeıli transformatsııasyna jol ashady. Qoǵamdy jikke bólip, azamattardy bir-birine qarsy qoıatyn destrýktıvti aqparat taratýǵa beıil adamdar da bar. Munyń bári óshpendilikke bastaıtyn eshkimge qajetsiz, tipti qaýipti pikirtalasqa jalǵasady. Jasandy ıntellektini osyndaı adamdar aqparattyq qarýǵa aınaldyryp, zańǵa qaıshy keletin kontentterdi kóptep tarata bastaıdy. Buǵan jol berýge bolmaıdy. Ondaı áreketterge quqyqtyq baǵa berip, jaýapkershilikke tartý qajet. Azamattarǵa destrýktıvti kontentti taratýdyń quqyqtyq saldary jóninde únemi túsindirý jumystaryn júrgizgen jón, — dedi Memleket basshysy.

Sonymen qatar Qasym-Jomart Toqaev tártipsizdik pen zańsyzdyqqa jol berýge bolmaıtynyn eske saldy.

— Ulttyq quryltaı otyrysynda men otanshyldyq uǵymy týraly pikirimdi aıttym. Otanshyldyq, bul jaı uran emes, otanshyldyq degenimiz — qasıetti sezim, munyń ásireultshyldyqqa esh qatysy joq. Qazaqstanda biz otanshyldyq uǵymyna jaýapkershilik jáne jasampazdyq turǵysynan qaraýymyz kerek, ıaǵnı otanshyl azamat eń aldymen jaýapkershiligi joǵary jáne jasampaz azamat bolýǵa tıis. Otanǵa degen súıispenshilik — saıası upaı jınaý nemese qyzmettik mansap jasaý emes, bul — Otanyńa jaqsylyq jasaý, elińe paıda ákelý degen sóz, — dedi ol.

Sonymen qatar jıynda Bas prokýror Berik Asylov, Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev, Prezıdenttiń kómekshisi Qýanyshbek Esekeev, Іshki ister mınıstri Erjan Sádenov sóz sóıledi.