Prezıdent tapsyrmasyna oraı ınfraqurylymdy damytý baǵdarlamasy jasalýda - S. Ahmetov

ASTANA. 14 maýsym. QazAqparat - QR Prezıdentiniń tapsyrmasyna oraı, ınfraqurylymdy damytýdyń memlekettik baǵdarlamasy jasalyp jatyr.

Búgin Parlament palatalarynyń birlesken otyrysy barysynda sóz sóılegen Úkimet basshysy Serik Ahmetov osylaı málim etti.

«Bul óte salmaqty baǵdarlama. Ony tyńǵylyqty zerdelep jatyrmyz. Jalpy, ınfraqurylymdy damytý úlken shyǵyndardy talap etedi. Árıne, munda tutastaı kóliktik-tranzıttik jáne kóliktik-logıstıkalyq ınfraqurylymdar salý men jańǵyrtý sharalary qamtylmaqshy», - dedi Premer-Mınıstr.

Budan bólek, Úkimet basshysy ındýstrııalyq-ınnovatsııalyq damý baǵytyndaǵy jumystyń da jalǵasatynyn, ekinshi besjyldyqqa qatysty sharalar qaralý bastalatynyn jetkizdi. «Onyń aıasynda klasterlik bastamalardy esepke ala otyryp, ınnovatsııalyq túrdegi kásiporyndardy salý kózdeledi», - dedi S. Ahmetov.