Prezıdent tapsyrmasymen laboratorııalyq zertteýler úshin ruqsat berý jeńildetiledi
NUR-SULTAN. QazAqparat – Qazaqstan Prezıdenti Qasym-Jomart Toqaev zerthanalyq zertteýler tıimdiligin arttyrý – pandemııamen barsha kúrestiń tıimdiligin qamtamasyz etetin basty komponent ekenin atap ótti, dep habarlaıdy QazAqparat tilshisi.
«Memlekettik komıssııaǵa zerthanalyq zertteý júrgizý úshin ruqsat berý rásimin jeńildetýdi jáne jeke sýbektiler tarapynan PTR-zerthanalardyń sany men qýatyn arttyrý úshin yntalandyrý jasaýdy tapsyramyn», - dedi Prezıdent koronavırýs indetiniń taralýyna qarsy kúres sharalary jónindegi keńeste.
Sonymen qatar Q. Toqaev qajetti materıaldarmen úzdiksiz qamtamasyz etý erekshe baqylaýǵa alynýy kerektigin atap ótti. Osy maqsattar úshin ımporttalatyn barlyq jabdyqtar men materıaldar «jasyl dáliz» boıynsha jetkizilýi tıis.
Memleket basshysy táýekel tobyndaǵy adamdarǵa, ıaǵnı qarttar men qant dıabeti, demikpe, týberkýlez jáne basqa da aýrýlary barlarǵa erekshe kóńil bólinýi tıistigin aıtty. Osy oraıda bul adamdardyń qaýipsizdigin birinshi kezekte qamtamasyz etý qajet.
Munymen qosa Prezıdent Dúnıejúzilik densaýlyq saqtaý uıymynyń ózekti usynystary men pandemııanyń qıyn kezeńinen ótken elderdiń tájirıbesin tyńǵylyqty qarap otyrýdy tapsyrdy.
