Prezıdent tapsyrmasy: Janarmaı baǵasyn ósirmeý úshin qandaı sharalar iske asyrylýda

NUR-SULTAN. QazAqparat - Memleket Basshysy Q. Toqaev 2022 jylǵy 11 qańtardaǵy Qazaqstan Respýblıkasy Parlamenti Májilisiniń otyrysynda sóılegen sózinde qolaıly naryq jaǵdaıynda benzın óndirýshiler men túrli deldaldar qosymsha paıda tabatynyn aıtty. Sonymen qatar aktsızder arqyly bıýdjet paıdasyna osy marjanyń bir bóligin alý qajettiligi atap ótildi. Bul rette, tıisti esepteýler júrgizý jáne baǵanyń ósýine jol bermeý tapsyryldy.

Aıta ketý kerek, 2021 jyly benzın men dızel otyny baǵasy aıtarlyqtaı ósken: benzın 30 teńgeden astam, dızel otyny 60 teńgeden astam. Bul rette aktsızder ózgergen joq.

Joǵaryda atalǵan tapsyrmany oryndaý úshin mynalar usynyldy:

- benzındi kóterme saýdada ótkizýge arnalǵan aktsız mólsherlemesin 1 tonna úshin 24 435 teńgeden 38 134 teńgege deıin ulǵaıtý (qazirgi ýaqytta benzınniń árbir lıtrindegi aktsız 17,8 teńgeni quraıdy, aktsız mólsherlemesin lıtrine 10 teńgege, ıaǵnı 17,8+10=27,8 arttyrý usynylady);

- dızel otynyn kóterme saýdada ótkizýge arnalǵan aktsızder mólsherlemesin 1 tonna úshin 9 300 teńgeden 35 726 teńgege deıin ulǵaıtý (dızel otynynyń ár lıtri 7,2 teńgeni quraıdy, aktsız mólsherlemesin lıtrine 20 teńgege arttyrý usynylady, ıaǵnı 7,2+20=27,2).

Bul rette, «Baǵalaryna memlekettik retteý belgilengen bólshek saýdada ótkiziletin munaı ónimderine shekti baǵalardy belgileý týraly» Qazaqstan Respýblıkasy Energetıka mınıstriniń 2015 jylǵy 19 mamyrdaǵy № 361 buıryǵyna ózgerister engizý týraly» Qazaqstan Respýblıkasy Energetıka mınıstriniń m.a. 2022 jylǵy 6 qańtardaǵy № 2 buıryǵyna sáıkes 180 kúnge deıin JJM bólshek saýda arqyly ótkizýge shekti baǵalar belgilengendikten, aktsızderdi arttyrý JJM baǵasynyń ósýine ákelmeıdi.

Budan basqa, shekti baǵalardyń qoldanylý merzimi aıaqtalǵannan keıin baǵalardyń odan ári ósýine jol bermeý úshin Memleket basshysy JJM óndirý jáne taratý salasyn reformalaý úshin usynystar keshenin ázirleýge tapsyrma berdi.

Osylaısha, qoldanystaǵy shekti baǵalar, sondaı-aq qabyldanatyn sharalar kesheni aıasynda aktsızderdiń ulǵaıýy JJM baǵasynyń ósýine ákelmeıdi.