Prezıdent tapsyrmasy: Jambylda qoımalar sany artyp, jem-shóp qyzý daıyndalýda
Aımaq basshysy aldymen Betqaınar aýyldyq okrýginde ornalasqan «Almaz» sharýa qojalyǵynyń qoımalaryn aralap kórdi. Jumabek Áshkenuly jetekshilik etetin sharýa qojalyq búgingi tańda aıaǵyna nyq turyp, aýdannyń, oblystyń áleýmettik-ekonomıkalyq damýyna súbeli úles qosýda.
Bıyl 200 gektarǵa kúzdik bıdaı, 200 gektarǵa dándik júgeri, 50 gektarǵa jazdyq arpa jáne 40 gektarǵa pııaz ekkenin aıtqan qojalyq basshysy birneshe jyldan beri kókónis ónimderin saqtaıtyn qoımalar salyp jatqanyn baıandady. Qojalyqta 15 aýyl turǵyny turaqty jumyspen qamtylǵan.
«Qazirgi tańda 4 qoımamyz bar. Ár qoımanyń syıymdylyǵy – 2000-2500 tonna. Ótken jyly ózimizdiń jáne aýdandaǵy basqa da sharýa qojalyqtardyń pııazyn saqtadyq. Aldaǵy ýaqytta ár jyl saıyn bir qoımadan salyp, jalpy sanyn onǵa jetkizýdi josparlap otyrmyz», – deıdi J.Áshkenuly.
Búginde aýdan boıynsha kókónis saqtaıtyn, jalpy syıymdylyǵy 40300 tonnany quraıtyn 32 qoıma bar. Aımaq basshysy aýdandaǵy qoımalardyń sanyn arttyryp, olardyń syıymdylyǵyn 100 myń tonnaǵa deıin jetkizýdi tapsyrdy. Bul óz kezeginde azyq-túlik baǵasynyń turaqtandyrýda da aıryqsha mańyzǵa ıe ekenin atap ótti. Aıta keteıik, qazirgi tańda jalpy Jambyl oblysy boıynsha 233 kókónis qoımasy bar desek, onda 243,4 myń tonna ónim saqtaýǵa bolady. Aýdandar men Taraz qalasyndaǵy osyndaı qoımalar sany men syıymdylyǵyn eseleı túsý boıynsha da naqty sharalar qabyldanýda. Qazirdiń ózinde óńirde qosymsha úsh qoımanyń qurylysy qolǵa alynǵan.
Budan keıin Berdibek Saparbaev Stepnoe aýyldyq okrýgine baryp, jońyshqa, júgeri alqabyn aralady. Aýyldyq okrýgte qazir jıyn-terin naýqany qyza túsip, qysqy mal azyǵyn qamdaý jumystary qarqyndy júrýde. Aýyldyq okrýg ákimi Júsipbek Spanov sharýashylyqtardyń egistik alqaptarynyń basynan taılanǵan shóptiń bir túgi 1300-1500 teńgeniń kóleminde satylyp jatqanyn aıtty.
«Qazir arqany keńge salyp júrseńizder, qysta zardabyn ózderińiz tartasyzdar. Sondyqtan aryq-atyzdardyń, ózen-kólderdiń jaǵasyndaǵy shóptiń barlyǵyn oryp alyńyzdar. Odan keıin egis alqaptaryndaǵy masaqtardy da uqyptap jınap alý kerek»,– dedi B.Saparbaev.
Al aýdan ákimdigi aýyl sharýashylyǵy bóliminiń basshysy Ádilet Qaspaqbaevtyń sózine súıensek, mal qystaýyn qalypty ótkizý úshin jalpy aýdan boıynsha 471000 tonna shóp daıyndaý qajet. Qazirgi tańda onyń 70 paıyzy daıyndalyp úlgergen.
«Birinshi kezekte mal azyǵyna degen ishki qajettilikti qamtamasyz etý maqsatynda árbir aýyldardaǵy sharýashylyqtarǵa daıyndalǵan jem-shópti kórshi oblystarǵa satpaý boıynsha aýdan ákiminiń qatysýymen túsindirý jumystary júrgizilgen. Al, qajetti jem-shóp qoryn daıyndaýǵa múmkindikteri joq jeke qosalqy sharýashylyqtarǵa aýdandaǵy iri sharýa qojalyqtary jetkizip berýde», –deıdi Á.Qaspaqbaev.
Sondaı-aq, aýdanda oblys ákiminiń tapsyrmasyna sáıkes ár aýyldyq okrýgterde jumysshy toby qurylyp, jeke úılerdi zerdeleý arqyly kimge qansha shóp jetpeıtini anyqtalýda eken.
Aýdan boıynsha 39,4 myń gektar sýarmaly jer bar. Sýdyń tapshylyǵy bilingenimen, «Qazsýshar» respýblıkalyq memlekettik kásipornynyń Qordaı fılıalynyń bólimshesiniń mamandarymen birlese atqarylǵan jumystyń nátıjesinde aýdan ákiminiń qaýlysymen shtab qurylyp, keste jasalyp, kezeń-kezeńimen sharýa qojalyqtarǵa sý berilýde.
Oblys ákiminiń aýdanǵa jumys sapary Qyrǵyz Respýblıkasynyń Chý oblysy, Issyk Ata aýdanynda ornalasqan «Chýmysh» sý torabynda jalǵasty. Aımaq basshysy vegetatsııalyq kezeńde sý tapshylyǵyn týyndatpaý asa mańyzdy ekenin basa aıtyp, sol boıynsha aýdan ákimine jaǵdaıdy baqylaýda ustaýdy tapsyrdy.
