Prezıdent tapsyrmasy: Úkimet toby barǵan kópbalaly otbasyna aqtóbelik kásipker úı berdi

AQTÓBE. QazAqparat - Úkimettiń QR Premer-mınıstriniń orynbasary Gúlshara Ábdiqalyqova bastaǵan áleýmettik blogynyń birinshi basshylarynan quralǵan jumys toby kópbalaly, muqtaj otbasylardyń turyp jatqan mekenjaıyna bardy. Búgin bir muqtaj otbasyǵa kásipkerdiń úı satyp alyp beretini belgili boldy, dep habarlaıdy QazAqparat tilshisi.

Gúlshara Ábdiqalyqova bastaǵan top birneshe otbasynyń jaldamaly páterine baryp, olardyń jaǵdaılarymen tanysty. Solardyń biri - Estemisovter otbasy.

«Munaı kompanııalaryna ınjenerlik jeliler tartyp berýmen aınalysatyn seriktestikte 80 adam jumys isteıdi. Jumysshylardyń 60 paıyzy oralman. Biz bir otbasynyń balalaryndaı birgemiz, jumysshylaryma nesıe aldyrmaımyn. Qajet bolsa kompanııadan paıyzsyz aqsha bólip, jalaqynyń bir bóligin tólep otyrýǵa múmkindik jasaımyn. Jyl saıyn 2-3 otbasy úı salady. Úkimet toby kelip, tanysqan otbasynyń biri meniń kompanııamda jumys isteıdi. Qanat Sadyqov taıaýda ǵana jumysqa ornalasty. Kópbalaly otbasyǵa úı alyp berýge sheshim qabyldap otyrmyz», - dedi «Aqtóbe munaı gaz» JShS-nyń dırektory Serik Estemisov.

Premer-mınıstrdiń orynbasary Gúlshara Ábdiqalyqova kásipkerge rızashylyǵyn bildirdi.

«Otbasyna baryp, jaǵdaıymen tanystyq. 10 jyl buryn Qazaqstanǵa kóship kelip, ár jerde turǵan. 4 balasy bar, kúıeýi jumys isteıdi, áıeli balalaryn baǵyp otyr. Osyndaı otbasyǵa kómekteskenińiz úshin alǵys aıtamyn», - dedi Gúlshara Ábdiqalyqova.

Jıyn kezinde qurylys kompanııasynyń basshysy Shamıl Kaspranov ta 7 balaly otbasyǵa páter syılaıtynyn aıtty. Qurylys kompanııasynda jumys isteıtin Baqytjan Aqberlıevke 2 bólmeli páter berildi.

Aıta keteıik, Shamıl Kaspranov sý tasqyny kezinde óz jumysshylaryna páter syılap, jetim balalarǵa qamqorlyq kórsetip júr.