PREZIDENT TAPSYRMASY - ÚKІMET QALAI ORYNDAP OTYR: Prezıdent júktegen tapsyrmaǵa salǵyrttyq tanytqan birinshi basshy jumystan ketedi

ASTANA. 5 qarasha. QazAqparat - Qazannyń 11-inde ótken Aqordadaǵy Úkimettiń keńeıtilgen otyrysynda Elbasy aıtqan synnan Úkimet nendeı qorytyndy shyǵardy? Búgingi Premer-Mınıstr Serik Ahmetovtiń tóraǵalyǵymen ótken Úkimet otyrysy tutastaı osy máselege arnalǵan bolatyn. Otyrys barysynda Elbasy synyn elep, odan tıisti qorytyndylar shyǵarmaǵan birqatar vıtse-mınıstrlerge sógis jarııalanyp, mindetterdi naqty atqarýǵa qatysty is-sharalar jospary qabyldanǵan bolatyn.

Bul synǵa qatysty jasalǵan sońǵy eskertý bolar. Óıtkeni, Úkimet basshysy Serik Ahmetov aldaǵy ýaqytta Elbasy tapsyrmasyna bos qaraǵan birinshi basshylar men oblys ákimderin birden jumystan bosatatynyn qatań eskertti. «11 qazandaǵy Úkimettiń keńeıtilgen otyrysynda Elbasy bizdiń jumysymyzdy ótkir synǵa alǵan bolatyn. Prezıdent aǵymdaǵy jaǵdaıǵa baılanysty Úkimetke birqatar naqty tapsyrmalar berdi. Qazirgi tańda memlekettik organdar, mınıstrler, ákimder tarapynan Elbasy tapsyrmalaryn oryndaý jumystary tıisti deńgeıde júrgizilmeı otyr»,- dedi jıyndy ashqan Premer S. Ahmetov. Budan soń aldymen Úkimet basshysy memlekettik satyp alýlar máselesine toqtaldy. «Halyq arasynda udaıy talqylanyp, únemi synnan kóz ashpaı kele jatqan sala osy. Sonda qarjy mınıstrligi naqty saraptama jasamaı ma? Sybaılas jemqorlyq pen bıýrokratııa qalypty jaǵdaıǵa aınaldy. Osy oraıda qandaı sharalar atqaryldy? Onyń barlyǵy jańa zań jobasynda qanshalyqty eskerildi?», - dedi Premer-Mınıstr. Óz kezeginde Qarjy mınıstri Bolat Jámishev memlekettik satyp alýlardy elektrondy júıege kóshirýdiń nátıjesinde bul jumys ashyq júrgizile bastaǵanyn, alaıda oǵan barlyq memlekettik organdar birdeı qatyspaı otyrǵanyn alǵa tartady. «Oǵan qosa, bizde konkýrstardyń 63 paıyzynda taýar men qyzmetter bir jerden satyp alyndy. Ol da durys emes. Ondaıda memlekettik organdar satyp alý konkýrstaryn joqqa shyǵaryp keledi de, aqyrynda barlyq taýarlardy bir jerden satyp alady. Sóıtip, elektrondy júıeni óz paıdasyna jaratyp jatady. Sondyqtan memlekettik satyp alýlar boıynsha Biryńǵaı uıymdastyrýshy organdy engizýdiń nátıjesinde atalǵan máseleler sheshilýi tıis», - deıdi B. Jámishev. Endigi synǵa ushyryǵan basty másele alkogol aınalymyna qatysty zań jobasy bolatyn. Bolat Jámishev jeltoqsannyń 10-yna deıin parlamentke osy qujatty usynbaqshy. Bul rette Premer-Mınıstr Serik Ahmetov alkogol ónimderine aktsızdi kóterý týraly tapsyrmany qatań júktedi. «2014 jyldyń tabaldyryǵynda turmyz. Reseı men Belarýs - Kedendik odaq boıynsha áriptesterimiz. Al olarda aktsız úsh esege joǵary. Bizdiń otandyq taýar óndirýshilerdiń alkogol ónimderine naryqqa joly jabyq. Soǵan qaramastan, Qarjy mınıstrligi balama sharalardy qabyldamaı otyr», - dedi Serik Ahmetov. Bul rette Úkimet basshysy atalǵan máselege qatysty birden «qalqan ornatý» degen bolmaýy kerektigin, kedendik shekara bolmaǵanymen, onda erejeniń qajettigin alǵa tartty. Sosyn Premer alkogol ónimderiniń aınalymy týraly zań arqyly tıisti sharalardy qaraýǵa bolatynyn da atap ótti. «Eń aldymen alkogolge aktsızdi kóterý kerek, ekinshiden, alkogol ónimderiniń, onyń ishinde óndiristiń naqty aınalymyn túsinikti etýge tıispiz», - degen Úkimet basshysy Qarjy mınıstri Bolat Jámishevke osy máselemen muqııat aınalysýdy tapsyrdy. Budan bólek, Úkimet basshysy bıýdjet qarjysyn ıgerý máselesine erekshe kóńil bólip, oǵan jaýapty laýazymdy tulǵalardy jazalaý máselesin de kóterdi. «Búginde biz bıýdjetti naqtylap, Parlamenttiń qaraýyna jiberdik. Sosyn bıýdjet qarajatyn ıgermeı qalǵan laýazymdy tulǵalardy jazalaý boıynsha tıisti usynystar jasaldy. Osyǵan baılanysty men densaýlyq saqtaý vıtse-mınıstri Bolat Takejanovqa, aýyl sharýashylyǵy vıtse-mınıstri Marat Tolybaevqa jáne qarjy vıtse-mınıstri Ardaq Teńgebaevqa sógis jarııalaımyn. Budan basqa, birqatar komıtet basshylary men basqa da laýazymdy tulǵalar jazaǵa tartyldy», - dedi Serik Ahmetov. Sondaı-aq Úkimet basshysy qarjy máselesine jaýapty oblys ákimderiniń orynbasarlaryna sógis jarııalaýǵa tapsyrma berdi. Sonymen qatar, Úkimet basshysy Indýstrııa jáne jańa tehnologııalar mınıstrliginiń jumysyn da synǵa aldy. Sosyn el ekonomıkasyndaǵy tıimsiz jobalarǵa ruqsat berip, osy saladaǵy jumysty durys júrgizbegeni úshin ındýstrııa jáne jańa tehnologııalar vıtse-mınıstri Albert Raýǵa da sógis berildi. Turǵyn úı-kommýnaldyq sharýashylyq salasyndaǵy kemshilikterdiń joıylmaýyna qatysty Óńirlik damý vıtse-mınıstri Serik Nokın de sógis estidi. Sosyn aıtylǵannyń barlyǵyn buqaralyq aqparat quraldarynda ashyq kórsetpegeni úshin mádenıet jáne aqparat vıtse-mınıstri Arman Qyryqbaev ta sógisten qur qalmady. «Qazirgi jaǵdaı jyldyń sońyna deıin ózgermese, men Prezıdenttiń atyna birinshi basshylardy, onyń ishinde mınıstrler men ákimderdi jazalaý týraly usynystardy engizý máselesin qarastyramyn. Sondyqtan Elbasynyń barlyq tapsyrmalaryn sapaly túrde oryndaý jumysyna basa nazar aýdarýdy qatań júkteımin», - dedi Úkimet basshysy.