Prezıdent tapsyrmasy: Sýarmaly jer kólemin ulǵaıtý boıynsha 1 mln ga jer aıqyndaldy
«Qazirgi ýaqytta sý sharýashylyǵy ınfraqurylymy júrgizilgen sýarmaly jerlerdiń kólemi 1,5 mln gektardy quraıdy. Memlekettik baǵdarlama aıasynda 2017-2019 jyldar kezeńinde 146 myń ga sýarmaly jer qalpyna keltirildi. Bul rette 2017-2018 jyldary qalpyna keltirilgen 80 myń ga sýarmaly jerdiń 37,7 myń gektary ǵana (Aqtóbe – 1,4 myń ga, Almaty – 11,3 myń ga, Jambyl – 20,4 myń ga, Qaraǵandy – 0,63 myń ga, Soltústik Qazaqstan-1,6 myń ga, Shyǵys Qazaqstan – 2,32 myń ga) maqsatty túrde paıdalanylady», - dedi vıtse-mınıstr vedomstvonyń alqa májilisinde.
Aıdarbek Saparov qalpyna keltirilgen jerdiń maqsatty túrde paıdalanylmaýynyń sebepterin atady. Onyń aıtýynsha sýarý júıeleriniń, jańbyrlatqysh tehnıkanyń bolmaýy, qarjylyq jáne basqa da problemalar barshylyq.
«Osyǵan oraı oblys ákimdikteri qalpyna keltirilgen sý sharýashylyǵy ınfraqurylymdarynda jerdi maqsatty paıdalaný boıynsha sharalar qoldanýy qajet. Bıyl 2019 jyly oryndalmaǵan kólemdi eskere otyryp 182 myń ga sýarmaly jer alqabyn qalpyna keltirý josparlanýda», - dedi ol.
Aıdarbek Saparov, sonymen qatar, Memleket basshysy 2030 jylǵa deıin sýarmaly jer kólemin kezeńmen 3 mln gektarǵa deıin ulǵaıtý jóninde tapsyrmasy qalaı oryndalyp jatqanyn aıtyp ótti.
«Qazirgi tańda oblys ákimdikteri 1 mln ga shamasyndaǵy jerdi aldyn-ala aıqyndady. Memlekettik-jekeshelik áriptestik mehanızmi arqyly jekeshelik áriptestiktiń qatysýymen ırrıgatsııalyq júıelerdi salý jáne jańa sýarmaly jerlerdi damytý jobalaryn iske asyrý úshin áleýetti ınvestorlardy, sýarý tásilderin jáne ósiriletin daqyldar qurylymyn aıqyndaý jumystaryn júrgizýde. Bul rette mınıstrlik, sonymen qatar, engizilgen sýarmaly jerlerdi tıimdi paıdalaný jumystaryn júrgizýde», - dedi ol.
