Prezıdent tapsyrmasy: ShQO depýtattary barlyq aýyldardy aralaıdy

ÓSKEMEN. QazAqparat – Shyǵys Qazaqstan oblysynda «AMANAT» partııasy fılıaly saıası keńesiniń aktıvi ótti. Jıynǵa aımaq basshysy Danıal Ahmetov qatysty, dep habarlaıdy QazAqparat tilshisi.

«AMANAT» partııasy oblystyq fılıaly músheleri jıyn barysynda el Prezıdenti Qasym-Jomart Toqaevtyń tapsyrmasy boıynsha partııa uıymdarynyń qyzmetin jańǵyrtýdy talqylady.

«Búgingi tańdaǵy basty másele - depýtattardyń halyq úshin ashyqtyǵy. Dıalog alańdaryndaǵy tikeleı qarym-qatynas áleýmettik jelilerdegi pikirlerge qaraǵanda áldeqaıda tıimdi ekenin bárimiz túsinemiz. Bizge bastaýysh partııa uıymdarynyń qyzmetine taldaý jasap, óńirdiń iri kásiporyndarynda qoǵamdyq qabyldaýlar qurý qajet», - dedi oblys ákimi Danıal Ahmetov.

Onyń aıtýynsha, halyq depýtattardyń dıalogqa ashyqtyǵyn jáne tilekteri men suraqtaryn tyńdaýǵa daıyn ekenin bilýi kerek. Sondyqtan 15 sáýirge deıin halyq qalaýlylary barlyq eldi mekendi aralap shyqpaq.

«Búginde óńirimizde sybaılas jemqorlyqqa qarsy is-qımyl jónindegi 20 qoǵamdyq keńes jumys isteıdi. Olardyń quramyna úkimettik emes uıymdar jáne BAQ ókilderi kirýi tıis. Jalpy, biz týyndaǵan barlyq máselelerdi júıeli túrde sheshý úshin partııalyq uıymdarǵa barlyq salalardan jas mamandardy tartýǵa tıispiz», - dedi aımaq basshysy.