Prezıdent tapsyrmasy: Oral qalasynda jańa sport kesheniniń qurylysy bastalmaq
BQO dene shynyqtyrý jáne sport basqarmasynyń basshysy Qaımen Esendııarov óńirlik kommýnıkatsııalar qyzmeti alańynda ótken brıfıngte málim etkenindeı, Prezıdent Qasym-Jomart Toqaev bıylǵy 9 naýryzda óńirge jumys sapary barysynda «QazMunaıGaz» UK» AQ qarajaty esebinen Oralda kóp fýnktsıonaldy sport keshenin salý máselesin pysyqtaý boıynsha tapsyrma bergen.
Q. Esendııarovtyń sózine qaraǵanda, tapsyrmaǵa sáıkes oblys basshylyǵy Ulttyq kompanııa ókilderimen sport keshenin salý úshin jer telimin belgileý boıynsha kelisim júrgizdi. Sonyń nátıjesinde qalanyń 10-shaǵynaýdany aýmaǵy tańdaldy. Bıyl qazan-qarasha aılarynda atalmysh sport kesheni qurylysyn bastaý josparlanyp otyr.
«Memleket basshysynyń sporttyq ınfraqurylymdy nyǵaıtý jónindegi tapsyrmalaryn oryndaý maqsatynda ótken jyly Syrym aýdany Buldyrty aýylynda dene shynyqtyrý-saýyqtyrý kesheni, Oral qalasynda 2, aýdandarda 24 sport alańy paıdalanýǵa berildi. Sondaı-aq, jyl basynan beri Kaztalov aýdanynda taǵy 3 sport alańy iske qosyldy. 2023 jyly Aqjaıyq aýdany Chapaev jáne Taıpaq aýyldarynda, aldaǵy jyly Kaztalov pen Tasqalada barlyǵy 4 dene shynyqtyrý-saýyqtyrý keshenin qoldanysqa berý kózdelip otyr», - dedi Q. Esendııarov.
Basqarma basshysy keltirgen málimetke qaraǵanda, óńir turǵyndarynyń dene shynyqtyrý men sportqa suranysyn qanaǵattandyrý maqsatynda oblysta 1 788 sporttyq qurylym jumys isteıdi.
Oblys boıynsha buqaralyq sportty damytýǵa jáne salaýatty ómir saltyn nasıhattaýǵa bıyl 235,196 mln teńge (ótken jyly – 231,518 mln) qaraldy. Qazirgi tańda óńirde dene shynyqtyrý jáne sportpen júıeli túrde aınalysýshylar sany 270 219-ǵa jetti, bul – oblys halqynyń 39 paıyzy. Jyl sońyna deıin bul kórsetkishti 41 paıyzǵa jetkizý oılastyrylyp jatyr.
