Prezıdent tapsyrmasy: Óńirlerde mektepter salýǵa 20 mlrd teńge bólinedi

NUR-SULTAN. QazAqparat – Prezıdenttiń tapsyrmasymen mektepter salýǵa bólinetin 20 mlrd teńgeni keı óńirler jol salýǵa jumsaǵysy keledi. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Memleket basshysynyń tapsyrasyna sáıkes, «Aýyl – el besigi» baǵdarlamasy aıasynda batys jáne ońtústik óńirlerde bilim berý, mádenıet, sport nysandaryn salý úshin qosymsha 20 mlrd teńge bólý josparlanǵan. Bir aptanyń ishinde ákimdermen birlesip, atalǵan óńirlerde bilim berý nyandaryn salý josparyn ázirleý qajet. Úsh aýysymdy jáne apatty mektepter problemasyn sheshýge aıryqsha nazar aýdarý kerek», - dedi Úkimet basshysynyń orynbasary Bilim jáne ǵylym mınıstrliginiń keńeıtilgen alqa otyrysynda.

Osy rette vıtse-premer bul máseleniń bári jaıdan-jaı kóterilip otyrmaǵandyǵyn basa aıtty.

«Ásirese, óńirlerge qatysty másele kúntártibinde tur. Ótkendegi jaǵdaılar kóz aldaryńyzda boldy. Osy máselelerdiń barlyǵyn túbegeıli eskerýimiz qajet. Sondyqtan Prezıdenttiń qosymsha 20 mlrd teńge bólýge qatysty sheshimine oraı keshe otyrys ótkizdim. Sonda aımaqtar jolǵa, ınfraqurylymǵa qatysty usynystar bergeni men úshin túsiniksiz. Keshe qatty áńgime boldy. Sondyqtan osy máseleni qysqa ýaqyttyń ishinde Prezıdenttiń naqty kórsetken tapsyrmasyna sáıkes sheshý joldaryn qaraýlaryńyzdy suraımyz. Ýaqyt joq. Eki kúnniń ishinde sheshýge tapsyrma berdim. Osy máselege de mınıstrlik erekshe qaraý kerek. Aımaqtarǵa baılanysty sheshimderdi qysqa ýaqyttyń ishinde qabyldaýymyz qajet», - dedi Eraly Toǵjanov.