Prezıdent tapsyrmasy: Medıtsına ýnıversıteti qyzmetkerleriniń jalaqysy ósedi
AQTÓBE. QazAqparat – Memleket basshysynyń tapsyrmasyna saı 2023 jyly Aqtóbedegi medıtsınalyq ýnıversıtette dárigerlerdiń ortasha jalaǵasy 500 myń teńge bolady, dep habarlaıdy QazAqparat tilshisi.
Prezıdent Qasym–Jomart Toqaev Ulttyq keńeste medıtsına qyzmetkerleriniń, JOO oqytýshylarynyń eńbekaqysyn ósirý jóninde tapsyrma bergen bolatyn . Marat Ospanov atyndaǵy Batys Qazaqstan memlekettik medıtsınalyq ýnıversıtetinde ońtaılandyrý jumysy nátıjesinde aq halattylardyń eńbegin eseleý kózdeldi.
«Qazirgi kezde ýnıversıtettegi ortasha jalaqy - 180 myń teńge. Máselen, emdeý isiniń mamandaryna 250 myń, medbıke, feldsher jáne taǵy da basqa orta medıtsına qyzmetkerine 200 myń, al ózge jumysshylarǵa 100 myń teńge jalaqy beriledi. Al oqytýshy-professorlar orta eseppen 220 myń tg alady. Jalaqy ósse 2023 jyly dárigerler 500 myń, medbıkeler men feldsherler 400 myń, kishi qyzmetkerler 200 myń teńge alýy tıis. Oqytýshylarǵa 400 myń teńge jalaqy taǵaıyndalady. Taǵy bir eskererlik jaıt, tájirıbe jınap júrgen oqytýshylardyń jalaqysy dárigerlerden kem túspeıdi. Sondyqtan ýnıversıtet kiristi arttyrý, ákimshilik shyǵyndy azaıtý, ońtaılandyrý jumysyn shıratady. Prezıdent tapsyrmasy oryndaý úshin kúsh salamyz», - dedi ýnıversıtettiń ekonomıka jáne josparlaý departamentiniń jetekshisi Ernar Imanǵalıev.
Aıta keteıik, ýnıversıtte shamamen 1800 adam eńbek etedi.
