Prezıdent tapsyrmasy: Medıtsına qyzmetkerleriniń ústemaqysyna bıýdjetten 137 mlrd teńge bólindi

NUR-SULTAN. QazAqparat – Densaýlyq saqtaý mınıstri Alekseı Tsoı epıdemııaǵa qarsy bir kisideı atsalysqan medıtsına qyzmetkerlerdiń bári de nazardan tys qalmaıtynyna sendirdi, dep habarlaıdy QazAqparat tilshisi.

«Epıdemııaǵa qarsy bir kisideı atsalysqan medıtsına qyzmetkerlerdiń bárin de tıisti áleýmettik ótemaqymen qamtýǵa tyrysamyz. Memleket basshysynyń memlekettik komıssııa otyrysynda bergen tapsyrmasyna sáıkes, osy jyldyń naýryz aıynan beri medıtsınalyq qyzmetkerlerge yntalandyratyn tólemder júrgizilýde. Búginge deıin medıtsınalyq qyzmetkerlerge 7,7 mlrd teńgeniń tólemi júrgizildi. Prezıdent 1 qyrkúıekte halyqqa Joldaýynda yntalandyratyn ústemaqy berýdi 2020 jyldyń sońyna deıin jalǵastyrýdy tapsyrǵan edi. Osy maqsatta bıýdjetten 137 mlrd teńge bólindi», - dedi Alekseı Tsoı OKQ-da ótken baspasóz máslıhatynda.

Eske sala ketsek buǵan deıin Qazaqstanda koronavırýstan jazylǵan 6 341 medıtsına qyzmetkerine ótemaqy berilgenin habarlaǵan bolatyn.