Prezıdent tapsyrmasy: Quqyq qorǵaý qyzmetine qatysty ilki joba tanystyryldy

NUR-SULTAN. QazAqparat - Aǵymdaǵy jylǵy 2 qazanda Bas prokýratýrada Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» Joldaýynda berilgen tapsyrmalardy oryndaý aıasynda júzege asyrylyp jatqan ilki jobanyń tanystyrylymy ótti.

Bul týraly QazAqparat QR Bas prokýratýrasynyń resmı saıtyna silteme jasap habarlaıdy.

Sharaǵa Qazaqstan Respýblıkasy Prezıdenti Ákimshiliginiń basshysy Erlan Qoshanov, Prezıdenttiń kómekshisi – Qaýipsizdik Keńesiniń Hatshysy Áset Isekeshev jáne quqyq qorǵaý organdarynyń basshylary, sondaı-aq quqyq qorǵaý júıesin reformalaý jónindegi jumys tobynyń músheleri qatysty.

Polıtsııa tergeýshisi men prokýror ilki jobanyń tájirıbede qoldanylýyn kórsetti.

Іlki joba adam quqyqtary men bostandyqtaryna qatysty sotqa deıingi tergep-tekserý organdarynyń negizgi sheshimderin kelisý boıynsha prokýrordyń ózine júktelgen mindetterin oryndaýdyń elektrondyq formatyn kózdeıdi.

Osyǵan deıin eki óńirde - Pavlodar jáne Shyǵys Qazaqstan oblystarynda ilki joba synaqtan ótti. 1 qazannan bastap joba respýblıkanyń barlyq aımaǵynda iske qosyldy.

Jobanyń máni tergeýshiniń is-áreketti saralaý, qaıta saralaý, sondaı-aq tergeýdi toqtatý týraly sheshimin sotqa deıingi tergep-tekserýdiń biryńǵaı tiziliminde elektrondyq túrde qalyptastyrýda bolyp tabylady.

Prokýror onlaın rejıminde olardyń zańdylyǵyn belgilengen merzimde tekserýge, zańbuzýshylyqtar anyqtalǵan jaǵdaıda den qoıý sharalaryn qabyldaýǵa mindetti.

Mundaı model is júrgizý qujattaryn daıyndaý ýaqytyn jáne tergeý merzimderin qysqartady.

Budan basqa, qylmystyq protseske qatysýshylarǵa qabyldanǵan protsestik sheshimderdi qashyqtan qadaǵalaýǵa, kelispegen jaǵdaılarda olarǵa ýaqtyly shaǵym jasaýǵa múmkindik beriledi.

Bas Prokýror bul jańalyqtar aldyn ala prokýrorlyq qadaǵalaýdy qamtamasyz etýge jáne adal azamattardyń qylmystyq qýdalaý sheńberine tartylýyn boldyrmaýǵa baǵyttalǵanyn atap ótti.

Kezdesý qorytyndysy boıynsha Erlan Qoshanov atqarylyp jatqan jumystardyń mańyzdylyǵyn atap ótip, aǵymdaǵy jyldyń sońyna deıin Jobany synaqtan ótkizýdi aıaqtaýdy, normatıvtik-quqyqtyq bazany daıyndaýdy jáne 2021 jylǵy 1 qańtardan bastap Memleket basshysynyń Qazaqstan halqyna Joldaýynda kórsetilgen tapsyrmalaryn iske asyrýǵa kirisýdi tapsyrdy.