Prezıdent tapsyrmasy: Qostanaıdaǵy bastaýysh qazaq mektebi jabylmaıdy
QOSTANAI. QazAqparat - Qostanaı qalasyndaǵy qazaq tilinde bilim beretin jalǵyz bastaýysh mektebi jabylmaıdy. Bul týraly búgin qala ákimi Qaırat Ahmetov jýrnalıstermen kezdesýde aıtty, dep habarlaıdy QazAqparat.
Buǵan deıin habarlaǵanymyzdaı, búgin Memleket basshysy Qasym-Jomart Toqaev Qostanaıdaǵy qazaq tilinde bilim beretin mekteptegi kúrdeli jaǵdaıǵa baılanysty alańdaýshylyq bildirgen edi.
«Jergilikti turǵyndardyń pikirine qaraǵanda, Qostanaıdaǵy qazaq tilinde bilim beretin jalǵyz mektepke qatysty kúrdeli jaǵdaı qalyptasyp otyr. Bilim mınıstri jáne oblys ákimi barlyq máseleni jańa oqý jylyna deıin sheshýi tıis», dep jazdy Prezıdent Twitter paraqshasynda.
Osy máselege qatysty oblystyq óńirlik kommýnıkatsııalar qyzmetinde qala ákimi Qaırat Ahmetovtiń tóraǵalyǵymen brıfıng ótti.
«Internette shyndyqqa sáıkes kelmeıtin málimetter tarap jatyr. Negizi másele jańa qazaq mektebin kóshirýden bastaldy. Bul jerde shý kóterip otyrǵan jurtshylyq durys túsinbegen. Biz mektepti jabý emes, ony basqa mekenjaıǵa kóshirý týraly usynys aıttyq, ıaǵnı bastaýysh mektepti Pobeda-Borodın kósheleri qıylysynda ornalasqan kolledjge kóshirý týraly bastama kóterildi. Ata-analardyń pikiri eskerilip, bastaýysh mektep óz ornynda qalatyn boldy. Sondyqtan, BAQ ókilderine resmı aqparatty ǵana taratýdy suraımyz»,- dedi Qaırat Ahmetov.
Brıfıngke qatysqan bilim berý isiniń úzdigi Ásııa Berkenova ınternette shý kótergen ata-analarǵa syn aıtty.
«400 orynǵa arnalǵan mektepte 600 bala oqyp jatyr. Bul bastaýysh mektepte meniń de nemerelerim oqıdy. Bul tusta ata-analardyń qala basshylyǵyna nege qarsylyq bildirgenin túsinbedim. Igilikti isti ıterip baryp isteıtinimiz ras. Sol sebepti, jańadan ashylǵaly otyrǵan qazaq mektebin qoldaý kerek. Urpaǵymyzdy oılasaq, durys sheshim qabyldaıyq»,- dedi Ásııa Berkenova.
Jıyn qorytyndysynda oblystyq bilim basqarmasynyń basshysy Vasılıı Tsymbalıýk óńirde qazaq mektepteriniń jabylmaıtynyn naqtylady. Onyń sózinshe, oblystaǵy 504 mekteptiń 120-da memlekettik tilde oqytylady.
