Prezıdent tapsyrmasy: Qostanaıda memlekettik tilde oqytatyn mektep-gımnazııa ashyldy
QOSTANAI. QazAqparat – Búgin Qostanaı qalasynda memlekettik tilde bilim beretin №28 mektep-gımnazııanyń saltanatty ashylýy ótti, dep habarlaıdy QazAqparat.
Bilim ordasynyń ashylý rásimine Qostanaı qalasynyń ákimi Qaırat Ahmetov, aqyn-jazýshylar, pedagogıkalyq jáne ata-analar qaýymdastyǵy qatysty.
«Memlekettik tilde oqytatyn mekteptiń ashylýy Memleket basshysynyń Qazaqstan halqyna Joldaýynda belgilengen qazaq tiliniń rólin kúsheıtý jáne jalpy bilim berýdi damytý salasyndaǵy mańyzdy qadam sanalady. Sonymen qatar, Uly Abaıdyń 175 jyldyǵy, fılosof ál-Farabıdiń 1150 jyldyǵy jańa gımnazııanyń ashylýy qarsańynda bilim alýshylar úshin shynaıy patrıotızmniń kepili bolatynyna senim bildiremin. Ras, jazdyń basynda qala turǵyndary arasynda qazaq tilinde oqytatyn mektepterdiń biri jabylatyny týraly qaýip boldy. Alaıda, qazaq tilinde oqytatyn mektepter sany qysqarmady, búginde olardyń sany jeteýge jetti», - dedi Qaırat Ahmetov.
Qala ákiminiń aıtýynsha, mektepte sapaly bilim berý úrdisi úshin barlyq jaǵdaılar jasalǵan. Ǵımaratty aǵymdaǵy jóndeýge jáne jabdyqtaýǵa 250 mln teńgeden astam qarajat bólindi. Qysqa ýaqyt aralyǵynda ǵımarattyń shatyry jóndelip, jylý, sýmen jabdyqtaý jáne kanalızatsııa júıesi tolyǵymen aýystyrylǵan. Sondaı-aq, gımnazııa úshin ashanalyq jáne mýzykalyq jabdyqtar, synyptarǵa jańa jıhazdar, sport jabdyqtary ornatyldy, hımııa, fızıka, bıologııa, horeografııa, robot tehnıkasy kabınetterine qarjy bólindi.
Mekteptiń jobalyq qýaty – 900 oryn. Qazirdiń ózinde munda 500-ge jýyq oqýshy bar. Gımnazııaǵa bilim alýshylardy qabyldaý jalǵasatyn bolady.
Aıta keteıik, Memleket basshysy Qasym-Jomart Toqaev bıylǵy shilde aıynda Qostanaıda qazaq tilinde bilim beretin jalǵyz bastaýysh mektebiniń kúrdeli jaǵdaıyna alańdaýshylyq bildirgen bolatyn.
«Jergilikti turǵyndardyń pikirine qaraǵanda, Qostanaıdaǵy qazaq tilinde bilim beretin mektepke qatysty kúrdeli jaǵdaı qalyptasyp otyr. Bilim mınıstri jáne oblys ákimi barlyq máseleni jańa oqý jylyna deıin sheshýi tıis», - dep jazǵan bolatyn Prezıdent Twitter-degi paraqshasynda.
Keıin osy máselege qatysty oblystyq Óńirlik kommýnıkatsııalar qyzmetinde qala ákimi Qaırat Ahmetovtiń qatysýymen brıfıng ótti.
«Internette shyndyqqa sáıkes kelmeıtin málimetter tarap jatyr. Negizi, másele jańa qazaq mektebin kóshirýden bastaldy. Bul jerde shý kóterip otyrǵan jurtshylyq durys túsinbegen. Biz mektepti jabý emes, ony basqa mekenjaıǵa kóshirý týraly usynys aıttyq. ıAǵnı, bastaýysh mektepti Jeńis-Borodın kósheleri qıylysynda ornalasqan kolledjge kóshirý týraly bastama kóterildi. Ata-analardyń pikiri eskerilip, bastaýysh mektep óz ornynda qalatyn boldy. Sondyqtan, BAQ ókilderine resmı aqparatty ǵana taratýdy suraımyz», - degen edi Qaırat Ahmetov.
