Prezıdent tapsyrmasy: Qostanaıda 45 oıyn alańy salynady

QOSTANAI. QazAqparat – Memleket basshysynyń tapsyrmasyna sáıkes Qostanaı qalasynda birneshe oıyn alańdary boı kóteredi, dep habarlaıdy QazAqparat tilshisi qala ákimdiginiń TKSh, jolaýshylar kóligi jáne avtomobıl joldary bólimine silteme jasap.

Aýlalardy damytý jumystary Qostanaı qalasynda qarqyndy túrde júrgizilip jatyr. Oblys ortalyǵynda bıyl 17 fýtbol alańy, 45 balalar alańy men 9 manej qoldanysqa beriledi.

«Ár túrli sport qurylǵylary, átkenshekter, syrǵanaǵy men qumsalǵyshy bar zamanaýı oıyn alańy paıda bolady. Qazir jasandy tósenishi bar 12 fýtbol manejiniń qurylysy bastalyp ketken. Nysandar qarasha aıyna deıin tapsyrylady. Aýlalardy abattandyrý bıýdjet esebinen júrgizilýde. «Jumyspen qamtýdyń jol kartasy» baǵdarlamasy aıasynda qolǵa alynǵan jobalardyń jalpy quny 440 mln teńgeni qurady. Oıyn alańdary talapqa saı jasalady. Balalardyń jaraqat alýyn boldyrmaý maqsatynda qaýipsizdik sharalary eskerilgen», - deıdi Qostanaı qalasy ákimdiginiń TKSh, jolaýshylar kóligi jáne avtomobıl joldary bóliminiń basshysy Naýryzbaı Mýsın.

Aıta keteıik, osy jyldyń sáýir aıynda QR Prezıdenti Qasym-Jomart Toqaev Memlekettik komıssııaǵa ákimdiktermen birlesip, aýlalardy jáne oıyn alańdaryn ashý máselesin tapsyrǵan bolatyn.

«Karantın kezinde ata-analarǵa kishkentaı balalarymen tórt qabyrǵaǵa qamalyp otyrý ońaı emes. Memlekettik komıssııa ákimdiktermen birlesip, aýlalardy jáne oıyn alańdaryn ashý máselesin oılastyrýǵa tıis. Árıne, aldymen, barlyq sanıtarlyq normalar men sanıtarlyq qaýipsizdik talaptary qatań saqtalýy kerek», - dedi Memleket basshysy.