Prezıdent tapsyrmasy: Qorshaǵan ortany qorǵaý boıynsha Jol kartasy ázirlenýde
«Eldegi iri qalalar men ónerkásiptik kásiporyndardyń aǵyn sýyn tazalaý boıynsha problema barshylyq. Elimizde 58 keshendi tazartý nysany jumys isteıdi. Onyń 10-y tolyǵymen tozǵan. 26-y qaıta jańartý jáne jańǵyrtýdy qajet etedi. Osy máseleler boıynsha Memleket basshysy Qasym-Jomart Toqaevtyń tapsyrmasy bar. Atyraý qalasyna barǵan saparynda Prezıdentke bul máseleler baıandalyp, pysyqtalyp, tıisti tapsyrmalar berildi. Qazir Úkimet bul máseleni kezeń-kezeńimen sheshý úshin jumys júrgizip jatyr», - dedi Qanat Bozymbaev OKQ-da ótken baspasóz máslıhatynda.
Ol barlyq ózekti máselelerdi sheshý maqsatynda vedomstvo jańa Ekologııalyq kodekstiń redaktsııasymen jumys júrgizip jatqanyn, joba kúzde Parlamentke engiziletinin málim etti.
«Eń bastysy - biz Kodekske EYDU elderiniń normalary men standarttary engizilýi tıis dep sanaımyz. Sol standarttarǵa jaqyndaǵan ekologııalyq normalar men normatıvterdi saqtaý bizdiń elimizge qorshaǵan ortany qorǵaý salasynda alǵa jyljýǵa múmkindik beredi. Eń jaqsy qoljetimdi tehnologııalar qaǵıdasy, qorshaǵan ortany lastaǵany úshin tólemder engiziledi. Búgingi kúni ákimdikter jergilikti bıýdjettiń 5 paıyzyn ǵana tabıǵatty qorǵaý sharalaryna jumsaıdy. Aınalyp kelgende qarajattyń bári qorshaǵan ortany qorǵaý isine qyzmet etýi tıis. Jańa Kodeks jobasy 80 paıyz daıyn», - dep naqtylady mınıstr.
Qanat Bozymbaevtyń aıtýynsha, Úkimettiń úılestirý jumystary aıasynda aýyldyq jáne qalalyq polıgondar qurylysy boıynsha tıptik erejeler ázirleý kózdelip otyr.
«Birinshi kezekte jergilikti atqarýshy organdar tarapynan kúsh-jiger qajet. Aýyldyq polıgondarǵa jeńildetilgen talaptar bolar edi. Sebebi, bul - jetkilikti kapıtaldy qajet etetin jumys. Tıisti jol kartasyn jergilikti atqarýshy organdar ázirlegen. Ótken jyly biz «Ǵarysh sapary» ruqsat etpegen qoqys úıindileriniń ǵaryshtan jasalatyn monıtorıngin jolǵa qoıdyq», - dedi Energetıka mınıstri.
