Prezıdent tapsyrmasy: Koronavırýstan basqa aýrý túrlerine josparly kómek jalǵasady
NUR-SULTAN. QazAqparat - Keıbir aýrý túrine shaldyqqan naýqastarǵa medıtsınalyq josparly kómekti qaýipsiz kórsetý boıynsha sharalar ázirleý qajet. Bul týraly Memleket basshysy Qasym-Jomart Toqaev koronavırýs indetiniń taralýyna qarsy kúres sharalary jónindegi keńeste aıtty, dep habarlaıdy QazAqparat tilshisi.
«Infektsııalyq emes ózge aýrýlarǵa josparly medıtsınalyq kómektiń qoljetimdiligin qamtamasyz etý qajet. Túptep kelgende COVID-19 bizdiń ómirimizde uzaq ýaqyt bolatyn sııaqty. Іndettiń ótkir kezeńinde ózge de aýrýǵa shaldyqqandardy josparly aýrýhanaǵa jatqyzý, tekserý jáne aldyn alý jumystary keıinge qaldyryldy. Degenmen, bul aldaǵy ýaqytta halyqtyń jalpy densaýlyǵyna keri áserin tıgizýi múmkin», - dedi Memleket basshysy.
Sondyqtan Qazaqstan Prezıdenti jańa jaǵdaıda onkologııalyq, kardıologııalyq, pýlmonologııalyq jáne ózge de medıtsınalyq josparly kómekti qaýipsiz kórsetý boıynsha sharalar ázirleý qajettigin basa aıtty.
«Bul jerde telemedıtsınany, qashyqtan keńes berýdi, dári-dármekti der ýaqytynda jetkizýdi jáne qajetti tekserýlerdi júrgizýdi paıdalaný múmkindigin jandandyrý mańyzdy», - dedi Qasym-Jomart Toqaev.
