Prezıdent tapsyrmasy: Kólik júrgizshileri úshin qujat sany qysqardy
Qaǵaz qujattardy elektrondy formatqa kóshirý Qazaqstandy tsıfrlandyrý baǵdarlamasy aıasyndaǵy basty mindetterdiń biri bolyp tabylady. Tolyp jatqan qujattardy ózińmen birge alyp júrýdi doǵarý avtokólik ıeleri úshin de ózekti másele bolyp otyr. Bul usynys Ulttyq qoǵamdyq senim keńesiniń ekinshi otyrysynda Memleket basshysynyń áleýmettik-ekonomıkalyq reformalar paketine engenin aıtqan.
Belgili bolǵandaı, qazirgi tańda Іshki ister mınıstrligi júrgizýshiler úshin qaǵaz qujattardyń sanyn qysqartý máselelesin pysyqtap qoıdy. Osyǵan qatysty ereje Parlament Májilisiniń depýtattary bastama etken jol qozǵalysy máselelerine qatysty zańnamaǵa engizildi. Budan bylaı avtokólikti teksergen jaǵdaıda tártip saqshysyna tek jeke basyn kýálandyratyn qujatty usynsa jetkilikti. Al kólik ıesi týraly ózge derekterdiń barlyǵyn, senimhattyń kimge jazylǵany, saqtandyrý polısi men tehnıkalyq baıqaýdyń merzimderi týraly JPQ ınspektorlary planshetten jáne júıege kirý arqyly kóre alady.
Aıta ketsek, Ulttyq qoǵamdyq senim keńesiniń ekinshi otyrysynda sóz alǵan elimizdiń Prezıdenti atalǵan máseleni sheshý jóninde úkimetke tapsyrma bergen bolatyn.
«Bizde áli kúnge deıin qaı jerde bolmesyn eń aldymen qaǵaz qujattardy talap etedi. Mysaly, júrgizýshilerdiń barlyǵy tehnıkalyq qujat, jeke kýálik, saqtandyrý qujaty, taǵysyn taǵylaryn ózimen birge alyp júredi. Olardy úıinde umytyp ketkeni úshin jazalanady. Úkimet osy máseleni sheshýge mindetti», – dep atap ótti Qasym-Jomart Toqaev.
QR tsıfrlyq damý, ınnovatsııalar jáne aeroǵarysh ónerkásibi mınıstri
Baǵdat Mýsın «avtokólikti tizgindeýge quqyly ekenińdi dáleldeý úshin ózińmen birge bir býma qujatty alyp júrý – ótken dáýirdiń kórinisi» dep málimdedi. Osyǵan baılanysty Tsıfrlyq damý mınıstrligi qujattardy ǵana emes, protsesterdi de avtomattandyrýdy maqsat etip otyr.
Kelip túsken usynystarǵa sáıkes, avtokólik júrgizýshisiniń ózimen birge quqyq belgileıtin barlyq qujattardy alyp júrýin mindettemeıtin ereje engizý kózdelýde. Tek jeke kýálik bolsa bolǵany. JPQ qyzmetkerleri sol boıynsha planshetten azamattyń atyna qandaı kólik tirkelgeni, saqtandyrý polısiniń merziminiń qashan aıaqtalatyny, tehnıkalyq baıqaýdan ótken kúni men aıyppuldyń bar-joǵy sekildi derekterdi tolyqtaı kóre alady. Sonymen qatar polıtseılerdiń qyzmettik planshetterin kóshedegi beınekameralarmen kiriktirý josparda bar.
Jalpy aıtqanda elimizdiń kólik naryǵy týraly sóz etetin bolsaq, Sońǵy málimetter, ıaǵnı 2020 jylǵy 1 qazandaǵy jaǵdaı boıynsha el aýmaǵynda 3,8 mln birlik jeńil kólik tirkelgen. 2020 jylǵy qańtar-qyrkúıekte 561,8 myń birlik jeńil avtokólik tirkeýge qoıylǵan eken. Bul ótken jyldyń dál osy kezeńimen salystyrǵanda 13,1%-ke kem. Sonymen qatar, shyqqan jyly boıynsha tirkelgen jeńil kólikterdiń jalpy sanynda zaýyttan shyqqanyna 10 jyldan asqan kólikterdiń sany basym (64,9%). Shyqqanyna 3 jyldan aspaǵan jeńil kólikter tirkelgen jeńil kólikterdiń jalpy sanynyń 11,5%-in, shyqqanyna 3 jyldan 7 jyl aralyǵyndaǵylar – 15%, 7 jyldan 10 jyl aralyǵyndaǵylar – 6,7%-ti quraıdy.
Eske salsaq, buǵan deıin, Qazaqstanda júrgizýshi kýáligin alyp júrmegeni úshin aıyppul salynbaıtyndyǵy týraly habarlaǵan bolatynbyz.