Prezıdent tapsyrmasy: «QazAvtoJol» men «Kazahavtodor» biryńǵaı jol kompanııasyna biriktirildi

NUR-SULTAN. QazAqparat – «QazAvtoJol» jáne «Kazahavtodor» biryńǵaı jol kompanııasyna biriktirildi, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, bıyl shilde aıynda Memleket basshysy Qasym-Jomart Toqaev Úkimettiń keńeıtilgen otyrysynda «QazAvtoJol» men «Kazahavtodordy» biriktirip, birtutas avtojol kompanııasyn qurýdy tapsyrǵan bolatyn.

Prezıdent tapsyrmasyn júzege asyrý maqsatynda Indýstrııa jáne ınfraqurylymdyq damý mınıstrligi atalǵan eki jol operatoryn biriktirý boıynsha Úkimet qaýlysynyń jobasyn daıyndady.

Jobada «QazAvtoJol» Ulttyq kompanııasy «Kazahavtodor» JShS-daǵy memlekettik úlesti satyp alý jolymen ulttyq kompanııany Biryńǵaı avtojol operatory retinde qaıta qurý qarastyryldy. Atap aıtqanda, atalǵan kompanııalardyń oblystyq fılıaldarynyń ákimshilik-basqarý personalyn qysqartý jolymen biriktirý jáne qaıtalanatyn fýnktsııalardy qysqartý.

«Qazir elimizdegi joldyń jaı-kúıin qadaǵalap, qyzmet kórsetetin eki negizgi operator bar. Týrasyn aıtsaq, ekeýi de bir jumysty atqaryp otyr, jumysshylarynyń sany da qajetti shamadan artyq. Soǵan qaramastan, azamattardan kelip jatqan oryndy aryz-shaǵymdar azaıar emes, al joldyń sapasy múlde syn kótermeıdi», – dep atap ótti Memleket basshysy Úkimettiń keńeıtilgen otyrysynda.

Osylaısha, qazirgi tańda «QazAvtoJol» jáne «Kazahavtodor» biryńǵaı jol kompanııasyna biriktirildi. Qolǵa alynǵan sharalar respýblıkalyq mańyzy bar joldardy táýlik boıy kútip ustaýdy qamtamasyz etýde jedel ári naqty sheshim qabyldaýǵa úlken septigin tıgizbek.

Foto : gov.kz