Prezıdent tapsyrmasy: Qala aýmaǵyn sapaly josparlaý standarttary maýsym aıynda bekitiledi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaevtyń aıtýynsha, qala aýmaǵyn sapaly josparlaý standarttary maýsym aıynda bekitiledi, dep habarlaıdy QazAqparat tilshisi.

«Memleket basshysy 2021 jylǵy Joldaýynda qalalardy keshendi salýdyń jańa standarttaryn ázirleý qajettiligin atap kórsetti.

Osyǵan baılanysty mınıstrlik Qala aýmaǵyn sapaly josparlaý standarttarynyń birinshi redaktsııasyn ázirlep, memlekettik organdar men uıymdarǵa kelisýge jiberdi», -dedi mınıstr Úkimet otyrysynda.

Onyń aıtýynsha, atalmysh standarttar tartymdy jáne yńǵaıly qoǵamdyq keńistikti qalyptastyrýdy, jaıaý júrginshiler men velosıped ınfraqurylymyn damytýdy eskergen, jınaqy qurylysty jobalaýdyń qarapaıym jáne kórneki quraly bolmaq.

«Osy standarttardy maýsym aıynda bekitý josparlanǵan. Ákimdikter atalǵan standarttardy eskere otyryp, ártúrli kózderden qarjylandyrylatyn toqsan saıynǵy/aýdan aralyq josparlardy ázirlep, bekitip, ınjenerlik ınfraqurylymdy, turǵyn úı qoryn kezeń-kezeńimen rekonstrýktsııalaýdyń keshendi tásilin ázirleýi qajet.

Búgingi kúni biz elimizdiń iri eldi mekenderiniń qalalyq ınfraqurylymyn damytý tujyrymdamasynyń pılottyq jobalaryn iske asyrýdy bastaýdy josparlap otyrmyz», - dedi Qaıyrbek Óskenbaev.