Prezıdent tapsyrmasy: Elimizde jyl saıyn 372 mln túp tal egiledi

NUR-SULTAN. QazAqparat – Memleket basshysynyń bıylǵy Joldaýyndaǵy tapsyrmaǵa sáıkes Qazaqstan aýmaǵynda jylyna 372 mln túp aǵash otyrǵyzylady. Bul týraly QR Ekologııa, geologııa jáne tabıǵı resýrstar vıtse-mınıstri Erlan Nysanbaev málim etti, dep habarlaıdy QazAqparat tilshisi.

«Memleket basshysy óziniń bıylǵy Joldaýynda el aýmaǵynda orman alqabyn ulǵaıtý kerektigin aıtty. ıAǵnı 2025 jylǵa deıin Qazaqstan boıynsha 2 mlrd túp aǵash otyrǵyzý mindeti tur. Bul degenimiz 85 myń ga jerdi quraıdy. Búginde el kólemindegi orman alqaby 6 mln gektarǵa jetip otyr. Ózderińiz biletindeı, bizdiń elimizde dalalyq alqaptar kóp, endigi maqsat - sol bos jerlerdi ormanǵa aınaldyrý», - dedi E. Nysanbaev BAQ ókilderimen ótken jıyn barysynda.

Onyń aıtýynsha, elimizde aǵash otyrǵyzý protsesi ár óńirdiń klımattyq jaǵdaıyna qaraı júrgiziledi.

«Aıtar bolsaq, soltústik aımaqtarda kóbine aqqaıyń, shyrsha jáne qaraǵaı otyrǵyzylatyn bolsa. Ońtústik aımaqtarda terek pen qara aǵashqa kóp mán beriledi. Sol sııaqty ońtústik jáne batys aımaqtar sekseýildiń otany bolyp esepteledi. Esep tilimen aıtqanda, 2025 jylǵa deıin 1 ga aýmaqqa 4300 túp aǵash otyrǵyzylmaq. Osy 4300 túp aǵashty 85 myń ga jer kólemine kóbeıtsek, demek jylyna 372 mln túp aǵash otyrǵyzamyz degen sóz. Sonda 5 jyl ishinde el boıynsha 1 mlrd 860 mln túp aǵash egiledi. Odan bólek, osy 5 jyldyń ishinde buryn shyqpaı qalǵan kóshetterdiń ornyna qaıta aǵash otyrǵyzýdy qolǵa almaqpyz. Osynyń bárin eseptegende 5 jyl kóleminde Prezıdenttiń tapsyrmasyna saı 2 mrld túr aǵash otyrǵyzý normasyn oryndaımyz dep oılaımyn», - dedi ol.

Eske sala ketsek, Memleket basshysy Qasym-Jomart Toqaev Qazaqstan halqyna arnaǵan bıylǵy Joldaýynda 2025 jylǵa deıin el kóleminde 2 mlrd túp aǵash otyrǵyzý mindetin qoıǵan bolatyn.