Prezıdent tapsyrmasy: Elimizde shóp shabý naýqanyna qosymsha janarmaı bólinedi

NUR-SULTAN. QazAqpart - QR Premer-Mınıstriniń orynbasary Roman Sklıar múddeli memlekettik organdar men óńir ákimdikteri ókilderiniń qatysýymen mal azyǵyn daıyndaý máseleleri boıynsha shuǵyl keńes ótkizdi. Bul týraly QazAqparat Aýyl sharýashylyǵy mınıstrligine silteme jasap habarlaıdy.

Aýyl sharýashylyǵy mınıstrliginiń usynysy boıynsha Úkimet shóp shabý naýqanyna arzandatylǵan janar-jaǵarmaıǵa qosymsha kólemin bólýge oblys ákimdikteriniń ótinimderin maquldaý týraly sheshim qabyldady. Osy aptada óńirlerge JJM jetkizý kestesin bekitý josparlanýda. Oblys ákimdikterine fermerlerge 43,6 myń tonna jeńildetilgen janar-jaǵarmaı jetkizýdi baqylaý tapsyryldy.

«Qazaqstan temir joly» UK» AQ 2021 jyldyń 31 shildesine deıin shóp tasymaldaý úshin respýblıkanyń barlyq aýmaǵynda ýaqytsha jeńildikter usyndy. Tasymaldaý quny 77%-ǵa tómendetildi. Bul shara batys óńirlerge qosymsha mal azyǵyn jyldam jetkizýge múmkindik beredi.

Jıyn barysynda mal jáne qus sharýashylyqtary úshin jem-shóp qoryn qalyptastyrý maqsatynda jemdik astyqty qosymsha satyp alý týraly usynys qaraldy. Qazir qarjylandyrý kózderi týraly másele zerttelýde.

Shaǵyn jáne orta fermerlik sharýashylyqtarda jem-shóp óndirisin yntalandyrý maqsatynda fermerlerge jem-shóp daıyndaý tehnıkasy men sýarýdyń utqyr júıelerin satyp alý úshin «Báıterek» holdıngine qosymsha qarjylandyrýdyń tetikterin ázirleý tapsyryldy.

Óńirlerdiń ákimdikterine mal azyǵy baǵasynyń qoljetimdi bolýyn turaqty baqylaý jáne aýyl sharýashylyǵy óndirýshilerimen jáne qurama jem kásiporyndarymen jemdi qoljetimdi baǵamen satý týraly memorandým jasasý tapsyryldy.