Prezıdent tapsyrmasy: Ekibastuzda kómir óndirisiniń kólemi azaıtylady
NUR-SULTAN. QazAqparat – Pavlodar oblysynyń ákimi Ábilqaıyr Sqaqov Ekibastuz qalasyn damytýdyń keshendi jospary aıasynda qandaı sharalar iske asatynyn aıtty, dep habarlaıdy QazAqparat tilshisi.
«Ekibastuzdyń ındýstrııalyq aımaǵynda jalpy quny 227,5 mlrd teńge bolatyn ınvestıtsııalyq jobalar qolǵa alynady. Qazir qalada energııa bloktaryn jańǵyrtý jobasy jedel júrgizilip jatyr. Munyń bári –Prezıdent Qasym-Jomart Toqaevtyń tapsyrmasy boıynsha biz ázirleıtin Ekibastuzdy damytýdyń keshendi josparynyń bir bóligi. Keshendi jospardy ázirleýge táýelsiz mamandar belsendi qatysty. 1,5 myńnan astam usynys qabyldanyp, 100-den astam saraptamalyq keńes ótti. Ótken demalys kúnderi biz bıznes-qoǵamdastyqpen, belsendilermen, qoǵam belsendilerimen jáne qalanyń tabysty turǵyndarymen pikir almastyq», - dedi oblys ákimi ortalyq kommýnıkatsııalar qyzmetindegi brıfıngide.
Aımaq basshysy jergilikti ákimdiktiń aldynda qalanyń otyn energetıkasyna táýeldiligin azaıtý mindeti turǵanyn atady.
«Jospardyń negizgi maqsattarynyń biri – Ekibastuz ekonomıkasynyń otyn-energetıkalyq keshenge táýeldiligin tómendetý. Ol úshin kómir óndirisin tómendetip, ınnovatsııalyq tehnologııalarǵa kóshý qajet. Qalanyń ónerkásibinde óńdeý salasynyń úlesin ulǵaıtamyz. Bul baǵyttaǵy jobalardy qarjylandyrý úshin bıýdjettiń 1 teńgesine jeke ınvestıtsııanyń 10 teńgesin tartýdy kózdep otyrmyz», - dedi Ábiqaıyr Sqaqov.
Sondaı-aq, oblys ákimi Ekibastuzda jańa baspanalar boı kóteretinin málim etti.
«Keshendi damý jospary qala turǵyndarynyń turǵyn úı, jumyspen qamtý jáne basqa da salalardaǵy kúndelikti problemalaryn sheshedi dep kútip otyrmyz. Qazir Ekibastuzda 5 turǵyn úı salynyp jatyr. Ótken aptada ǵana 5 turǵyn úı qoldanysqa berildi. Bul páterlerdiń bári baspana kezeginde turǵandarǵa tabystaldy. Turǵyn úı qurylysyna da jeke ınvestıtsıalar tartýdy ózimizge mindet etip qoıdyq», - dedi Pavlodar oblysynyń basshysy.
