Prezıdent tapsyrmasy: Buqtyrmaǵa kópir salý jumysy qalaı júrgizilip jatyr
NUR-SULTAN. QazAqparat – Shyǵys Qazaqstan oblysynyń ákimi Danıal Ahmetov Buqtyrma arqyly kópir salý boıynsha Prezıdenttiń tapsyrmasy qalaı júzege asyrylǵaly otyrǵanyn jetkizdi, dep habarlaıdy QazAqparat tilshisi.
«Buqtyrma sý qoımasy arqyly ótetin kópir qurylysy boıynsha bıyl sáýir aıynyń sońyna deıin respýblıkalyq bıýdjetten qarjylandyrý naqtylanatynyn habarlaımyn. 2017 jyldyń 7 jeltoqsanynda 01-0613/17 nómirli memlekettik saraptama nátıjesi alynǵan jobalyq-smetalyq qujattamaǵa saı jobanyń quny - 32 mlrd teńge. Sondaı-aq, jergilikti bıýdjetten merdiger mekemeni anyqtaý maqsatynda baıqaý sharalaryn ótkizýge tıisti qarjy qarastyrylyp otyr», - dep jazdy ákim Facebook-tegi paraqshasynda.
Danıal Ahmetovtiń málimdeýinshe, qazirgi tańda parom saǵat 07.00-den 21.00-ge deıin kestege saı qyzmet etýde. Muzdyń qalyńdyǵy 5-7 santımetr, avtokólik qozǵalysyn shekteý úshin kúzet qoıylǵan.⠀
«Óńir turǵyndaryn óziniń jáne ózgeniń ómirine joǵary jaýapkershilikpen qaraýǵa shaqyramyn!» - dep jazdy ákim.
Eske sala ketsek, byltyr Memleket basshysy Úkimetke Shyǵys Qazaqstan oblysynyń ákimdigimen birge Buqtyrma sý qoımasy arqyly kópir salý úshin qarjy bólý máselesin qarastyrýdy tapsyrǵan bolatyn.
