Prezıdent tapsyrmasy: Buqtyrmadaǵy kópir qurylysynyń qazirgi jaǵdaıy qandaı
Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynyp jatqany belgili. Bıyl qurylys jumystaryna qosymsha qarajat bólinedi.
Bul týraly ákimdikte ótken jınalys barysynda oblys ákiminiń birinshi orynbasary Almashan Smatlaev málim etti.
«Qazir kópirdiń jeti tiregi ornatylyp qoıdy, taǵy tórteýi ornatylyp jatyr. Kópirge aparatyn 18 shaqyrymdyq jol tolyqtaı jóndelip, ázirlendi. Qurylys jumystary josparǵa sáıkes júrýde», - dedi ol.
Eki jolaqty avtokólik kópiri Quıǵan aýylynyń janyndaǵy jasandy sý qoımasynyń eni eń jińishke ýchaskesinde salynýda. Kópirdiń uzyndyǵy 1,3 shaqyrymnan asady.
Jalpy Shyǵys Qazaqstanda bıyl 242 shaqyrym jol jóndelmek. Bul maqsatta 7 mlrd teńgeden astam qarajat bólinedi.
Eske salsaq, byltyr Buqtyrma arqyly ótetin kópir qurylysyna qosymsha 20 mlrd teńge qaralatyndyǵy habarlanǵan bolatyn.