Prezıdent tapsyrmasy: Buqtyrmadaǵy kópir qurylysyna taǵy 20 mlrd teńge bólinedi

ÓSKEMEN. QazAqparat – Shyǵys Qazaqstan oblysynda Buqtyrma sý qoımasy arqyly ótetin kópir qurylysy jalǵasýda, dep habarlaıdy QazAqparat tilshisi.

Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynyp jatqany belgili. Kópir qurylysy 2024 jylǵa deıin aıaqtalady dep kútilýde.

«Qazirgi ýaqytta eki jaq jaǵalaýda da tirekter salynyp jatyr. Ýaqytsha kópir tolyqtaı salynyp bitti. Sol arqyly qurylys-montajtaý jumystary júrgizilýde», - deıdi Kúrshim aýdanynyń ákimi Almat Aqyshov.

Onyń aıtýynsha, bıyl kópir salýǵa 15 mlrd teńge bólingen. Qazirdiń ózinde kópirde bolatyn 21 tirektiń 9-y ornatylyp qoıdy. Jumysty jedeldetý úshin kelesi jyly qurylysqa qosymsha 20 mıllıard teńge bólinedi dep kózdelýde.

Aıta keteıik, bul Qazaqstandaǵy eń uzyn kópir bolmaq. Onyń jalpy uzyndyǵy - 1316 metrdi quraıdy.

Eske salsaq, byltyr Buqtyrmada Qazaqstandaǵy eń uzyn kópirdiń qurylysy bastalǵany habarlanǵan.