Prezıdent tapsyrmasy: Buqtyrmadaǵy kópir qurylysyna 50 adam tartylǵan
Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynatyny belgili. Búginde kópir qurylysy qarqyndy júrgizilýde.
«Aınalma jol salý, geodezııalyq jáne elektr jelilerin tartý boıynsha jumystar aıaqtaldy. Endigi kezekte negizgi kópirdi salýǵa qajetti ýaqytsha kópirdiń qurylysy júrgizilip jatyr. Sol jerde vahtalyq ádispen 50 adam jumys isteýde. Jumysshylar úshin 250 oryndyq jataqhana qalashyǵy salynǵan. Qurylysqa qajetti materıaldar jetkilikti», - dedi Kúrshim aýdandyq ishki saıasat, mádenıet, tilderdi damytý jáne sport bóliminiń basshysy A.Qasymbaeva.
Búginde sýdaǵy 92 metr jerge dıametri 1000 jáne 1450 sm bolatyn arnaıy temir tireýler qaǵylyp, ústi beton konstrýktsııamen jabylǵan. Jeltoqsan aıynan bastap negizgi kópirdiń tireýleri qoıyla bastaıdy.
Aıta keteıik, bul Qazaqstan boıynsha eń uzyn kópir bolmaq. Joba boıynsha onyń uzyndyǵy 1,3 shaqyrymnan asady.
