Prezıdent tapsyrmasy: Buqtyrmadaǵy kópir qurylysy qalaı júrgizilýde
ÓSKEMEN. QazAqparat – Shyǵys Qazaqstan oblysynda Buqtyrma sý qoımasy arqyly ótetin kópir qurylysy júrgizilip jatyr, dep habarlaıdy QazAqparat tilshisi.
Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynatyny belgili. Bıyl osy maqsatta oblystyq bıýdjetten 1 mlrd teńge bólingen bolatyn.
«Búgingi tańda arnaıy tehnıkalarǵa arnalǵan jol tóselgen. Dánekerleý jáne basqa da jumystardy úzdiksiz atqarý úshin baǵandar ornatylyp, elektr jelisi tartyldy. Aýyr júk tehnıkalarymen jaǵalaýdaǵy aralǵa topyraq tasý jumystary júrgizilip jatyr. Sýǵa arnalǵan skvajınalar burǵylanyp, aýyzsýmen qamtylǵan. Kópir salý boıynsha jumystar bekitilgen josparǵa sáıkes atqarylatyn bolady», – dep habarlady Kúrshim aýdanynyń ákimdigi.
Sondaı-aq, kópir qurylysyn júrgizetin jumysshylar úshin 250 oryndyq jataqhana qalashyǵynyń qurylysy bastalǵan. Qazirde ǵımarattyń qańqasy qalanyp qoıdy.
Aıta keteıik, kópir qurylysy boıynsha ótken konkýrstyń jeńimpazy bolyp «OblShyǵysJol» kompanııasy atanǵan bolatyn.
