Prezıdent tapsyrmasy boıynsha BQO-da 110 eldi mekenge aýyz sý jetkizildi
Turǵyndardy taza aýyz sýmen qamtý - Jańaqala aýdanynda mańyzdy máseleniń biri bolyp keldi. 2017 jyly tamyz aıynda «Qulshyq» jerasty sý kózinen Jańaqala toptyq sý qubyrynyń qurylysy bastalǵan.
Bul toptyq sý qubyrynan aýdan boıynsha segiz eldi meken, atap aıtsaq, Jańaqazan, Jýalyoı, Másteksaı, Muqyr, Jańajol, Sarykól, Jańaqala, Kópjasar aýyldarynyń turǵyndary taza aýyz sýmen qamtamasyz etildi.
Qubyrdyń uzyndyǵy 150 shaqyrym. Sý jınaıtyn rezervýar syıymdylyǵy 2 000 tekshe metr.
«Bul kópten kútken qýanyshty jaǵdaı. Elbasy N.Nazarbaevtyń tapsyrmasyna sáıkes, biz oblys boıynsha 110 eldi mekenge taza aýyz sýdy jetkizdik. Búgin sizder sonyń nátıjesin kórip otyrsyzdar. Elbasy Joldaýynda aýyl halqynyń turmys-tirshiligin, ómir súrý sapasyn kóterýdi júktep, mindettegen bolatyn. Sebebi, bizdiń óńirdiń teń jartysy aýdandar men aýyldarda tur. Aýylda adam ómiriniń sapasyna áser etetin birden-bir nárse, ol - aýyz sý, jol, gaz. Jańaqalada da taza aýyz sý talaı jyldan beri «jyr» bolyp kele jatqan másele. Bul máseleni men Elbasyǵa baıandadym, ol qoldady. Sonyń nátıjesinde 110 eldi meken nemese 2000 shaqyrym sý qubyry tartyldy. Eń bastysy taza aýyz sý bolsa, adamnyń densaýlyǵyna da paıdaly bolady, ómir súrý sapasy da artady. Sondyqtan, sapaly aýyz sýdyń ıgiligin, paıdasyn ózderińiz kórińizder», - Altaı Kólginov.
Oblys ákimi Jańaqala toptyq sý qubyrynyń qurylysyn júrgizgen Oral saýda-ónerkásip kompanııasynyń dırektory V.Krylovqa alǵys bildirdi.
