Prezıdent tapsyrmasy: BQO-da jańa dene shynyqtyrý-saýyqtyrý kesheni paıdalanýǵa berildi
Keshenniń ashylý rásimine qatysqan oblys ákimi Narıman Tóreǵalıev atalmysh ǵımarattyń Memleket basshysy Qasym-Jomart Toqaevtyń tapsyrmasyna sáıkes buqaralyq sportty damytý baǵytynda qolǵa alynǵan «100 dene shynyqtyrý-saýyqtyrý kesheni» jobasy aıasynda iske qosylǵanyn jetkizdi.
Osy maqsatta ótken jyly oblys boıynsha 6 keshen qoldanysqa berilgen edi.
Óńir basshysynyń atap ótkenindeı, Syrym aýdanynda buqaralyq sportty damytýǵa keńinen kóńil bólinip keledi. Osy aýdannyń ózinen maıtalman sportshylar men chempıondar ósip shyqty. Sonyń ishinde Buldyrty aýylynyń túlekteri az emes. Solardyń biregeıi – QR eńbek sińirgen sport sheberi, erkin kúresten qazaq jigitteri arasynan alǵash ret álem chempıonatynyń kúmis júldegeri atanǵan Nurlan Bekjanov.
Buldyrtydaǵy 50 kórermen oryndyǵy bar blokty-modýldi ǵımarat qysqa merzimde qurastyryldy. Joba quny 223,4 mln teńge bolsa, merdiger mekeme – «QazDamuConstruction» JShS.
Jańa keshende voleıbol, fýtbol, basketbol jáne erkin kúres úıirmeleri jumys isteıtin bolady.
BQO dene shynyqtyrý jáne sport basqarmasynyń basshysy Qaımen Esendııarovtiń aıtýynsha, bul – oblys boıynsha aýyldyq okrýgter ortalyǵynda bıýdjettik qarjyǵa salynyp, ashylyp otyrǵan alǵashqy keshen.
«Óńirde salynyp jatqan ǵımarattar bar. Aldaǵy jyly osyndaı jańa keshender qatary kóbeıedi dep úmittenip otyrmyz», dedi QazAqparat tilshisine Q.Esendııarov.
Eske sala keteıik, budan buryn BQO-nyń úsh aýdanynda toqtap qalǵan sport kesheniniń qurylysy qaıta jandanatynyn jazǵan bolatynbyz.
Sýretterdi túsirgen Aıjan Amangeldına.