Prezıdent tapsyrmasy: Bıyl Nur-Sultanda 10 myń áleýmettik páter salynady
NUR-SULTAN. QazAqparat – Bıyl Nur-Sultanda jeńildikpen beriletin 10 myń áleýmettik páter turǵyzylady. Tek sońǵy úsh jyldyń ishinde qoljetimdi turǵyn úı sany 5,5 eseden astamǵa ulǵaıdy.
Bul týraly Nur-Sultan qalasynyń ákimi Altaı Kólginov aıtyp berdi, dep habarlaıdy QazAqparat tilshisi.
«Qala turǵyndarynyń mańyzdy jáne ózekti máseleleriniń biri – turǵyn úı. Prezıdent tapsyrmasymen jeńildikti qoljetimdi turǵyn úı qurylysyn arttyrý boıynsha júıeli jumys júrgizýdemiz. Mysaly, 2018 jyly 1800 áleýmettik páter, 2019 jyly – 2 900 áleýmettik páter salynsa, 2020 jyly –7 000-nan astam páter salynyp, paıdalanýǵa berildi. Bıyl bul kórsetkishti 10 myńǵa jetkizýdi josparlap otyrmyz», - dedi A. Kólginov Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, jaqynda kezekte turǵan áleýmettik osal toptaǵy 400-ge jýyq turǵynǵa páter kiltteri beriledi. Qoljetimdi baspana barlyq aýdandarda salynyp jatyr.
«Odan bólek, turǵyn úı sertıfıkattarynyń somasy 1 mln teńgeden 1,5 mln teńgege deıin ulǵaıtyldy, qazaqstandyq turǵyn úı kompanııasynyń (QIK) baǵdarlamasynda qatysýshylar sanaty keńeıtildi: medıtsına qyzmetkerleri, pedagogtar, áleýmettik qyzmetkerler, órt sóndirýshiler, tártip saqshylary, mádenıet jáne sport qaıratkerleri qatysa alady. Sondaı-aq, Elbasynyń bastamasymen qolǵa alynǵan «Jumys isteıtin jastarǵa arnalǵan jalǵa beriletin baspana» baǵdarlamasy bıyl da jalǵasady. Osy baǵdarlama aıasynda jyl sońyna deıin taǵy myńnan astam jastar baspanaly bolady. Osy myń páterden bólek, bıyl jyl basynda 350 jasqa páter kilti tapsyrylǵan bolatyn. Sol sııaqty 2021 jyly jastar úshin arnaıy turǵyn úı baǵdarlamasy iske qosylady», - deıdi A. Kólginov.
