Prezıdent tapsyrmasy: Bırjalyq saýda-sattyq ýaqytsha toqtatyldy

NUR-SULTAN. QazAqparat – Memleket basshysynyń tikeleı tapsyrmasy boıynsha bırjalyq saýda-sattyqty jaǵdaı turaqtalǵanǵa deıin ýaqytsha keıinge qaldyrý týraly sheshim qabyldandy. Bul týraly QR Básekelestikti qorǵaý jáne damytý agenttiginiń tóraǵasy Serik Jumanǵarın málimdedi, dep habarlaıdy QazAqparat tilshisi.

«Memleket basshysynyń tikeleı tapsyrmasy boıynsha bırjalyq saýda-sattyqty jaǵdaı turaqtalǵanǵa deıin ýaqytsha keıinge qaldyrý týraly sheshim qabyldandy. Osyǵan baılanysty birinshi kezekte agenttik aldynda avtogazǵa belgilengen shekti baǵalardyń saqtalýyn baqylaý mindeti tur. Kelesi jyldan bastap saýda-sattyqty qaıta bastaýǵa daıyndaý úshin agenttik tarapynan suıytylǵan gaz saýdasynyń sektsııalyq bırjalyq erejeleri ázirlenedi», - dep jazdy Serik Jumanǵarın óziniń Facebook-tegi paraqshasynda.

Sondaı-aq agenttik tóraǵasy osy ýaqyttan bastap suıytylǵan gaz bırjalyq taýar dep tanylǵanyn eske saldy. Bul suıytylǵan gaz saýdasynyń júrgizilýin odan ári baqylaýdy básekelestikti qorǵaý jáne damytý agenttigi júrgizetinin bildiredi.

«Búgingi tańda belgilengen ókilettikter sheńberinde agenttik avtogazǵa bólshek saýda baǵalaryn ýaqytsha retteýdi engizdi. Energetıka mınıstrligi kóterme saýdada ótkizýdiń shekti baǵalaryn belgiledi», - dep túsindirdi Serik Jumanǵarın.