Prezıdent tapsyrmasy: Azamattyq qoǵamdy damytý tujyrymdamasy tanystyryldy
Qujatty QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Álııa Ǵalymova tanystyrdy.
Onyń aıtýynsha, tujyrymdama azamattyq qoǵamdy qoldaý jáne nyǵaıtý, ózekti áleýmettik mindetterdi sheshý, kóppartııalylyqty damytý, saıası básekelestikti jáne eldegi pikir alýandyǵyn alǵa jyljytý sharalaryn kózdeıdi.
«Tujyrymdama jobasyn tórt basymdyq boıynsha iske asyrý boljanýda. Birinshi basymdyq - azamattyq qoǵam salasyndaǵy zańnamany jetildirý, úkimettik emes qyzmetti quqyqtyq retteýdi jetildirýge baǵyttalǵan 3 mindet pen 9 bastamany iske asyrýdy qamtıdy. Úkimettik emes uıymdarǵa memlekettik qoldaý tetikterin damytý, volonterlik jáne qaıyrymdylyq qyzmetti, qoǵamdyq keńester qyzmetin jetildirý, saıası partııalarǵa qatysty zańnamalarǵa ózgerister men tolyqtyrýlar engizý, BAQ jáne medıatsııa ınstıtýtyn jetildirý taqyryptary kóterilgen», - dedi Á. Ǵalymova elordada Tujyrymdamanyń tanystyrylymy barysynda.
Birinshi basymdyq boıynsha, azamattyq qoǵam salasyndaǵy 11 zańǵa ózgerister men tolyqtyrýlar engizý josparlanǵan.
«Atap aıtqanda, kommertsııalyq emes uıymdar, áleýmettik jobalardy memlekettik qarjylandyrý taqyryptaryn qamtıdy. Volonterlar jyly aıasynda volonterlik qyzmet týraly zańǵa túzetýler ázirlenedi. 2015 jyly qabyldanǵan qaıyrymdylyq qyzmet týraly zańdy da jetildirýdi bastadyq. Qoǵamdyq keńester týraly zańǵa ózgerister men tolyqtyrýlar engizý zańy Parlament Májilisine engiziledi», - dedi ol.
Ekinshi basymdyq - memlekettik mindetterdi sheshýde ÚEU rólin kúsheıtý, volonterlik pen jergilikti ózin-ózi basqarýdy damytýǵa baǵyttalǵan 3 mindet pen 9 bastama iske asyrylady. Bul basymdyq aıasynda úkimettik emes uıymdardy kásibılendirýge, onyń básekege qabilettigin arttyrýǵa basa nazar aýdarylady. Bul úkimettik emes uıymdar usynatyn qyzmetterdiń sapasyn arttyrýǵa, azamattardyń qatysýymen ózekti máselelerdi sheshýge múmkindik beredi. Sondaı-aq, ÚEU turaqty damytý maqsattaryn ımplementatsııalaý jumystary josparlanýda.
«Úshinshi basymdyq, halyqtyń ózekti problemalaryn sheshýde memlekettiń azamattyq qoǵam ınstıtýttarymen ózara is-qımyl tetikterin jetildirý, halyqtyń muń-muqtajyna qulaq asatyn memleket qaǵıdattaryna sáıkes, azamattardyń sheshimderi men memlekettik qujattardy ázirleýge qatysý múmkindikterin keńeıtýge baǵyttalǵan. Tórtinshi basymdyq - qoǵamdyq-saıası jańǵyrtýda zańnamany lıberalızatsııalaý, kóppartııalylyqty, saıası plıýralızmdi damytý jóninde sharalar qabyldanady», - dedi Álııa Ǵalymova.
QR Aqparat jáne qoǵamdyq damý mınıstrliginiń habarlaýynsha, 2025 jylǵa deıingi azamattyq qoǵamdy damytý tujyrymdamasy jyl sońyna deıin qabyldanady.
Eske sala ketsek, 2019 jyldyń 2 qyrkúıeginde Prezıdent Qasym-Jomart Toqaev Qazaqstan halqyna Joldaýynda azamattyq qoǵamǵa qoldaý bildirýdi tapsyrǵan bolatyn.
19 qyrkúıekte QR Premer-Mınıstriniń orynbasary Berdibek Saparbaev 2025 jylǵa deıingi azamattyq qoǵam tujyrymdamasynyń ázirlenip jatqanyn habarlady.
