Prezıdent tapsyrmasy: Aýyldaǵy jumys berýshiler eńbekkerlerge jalǵa beriletin úı salady

NUR-SULTAN. QazAqparat – QR Prezıdentiniń baspasóz hatshysy Berik Ýálı aýyldarda jalǵa beriletin úı salý boıynsha jumys berýshilerdiń shyǵyndary qalaı sýbsıdııalanatynyn túsindirdi, dep habarlaıdy QazAqparat.

Bul tapsyrma 2020 jylǵy 1 qyrkúıektegi Memleket basshysy Qasym-Jomart Toqaevtyń Qazaqstan halqyna Joldaýynda aıtylǵan edi.

«Aýyl eńbekkerlerin qoljetimdi baspanamen qamtamasyz etý úshin jumys berýshilerdiń shyǵyndaryn sýbsıdııalaý arqyly jaldamaly úıler salýǵa mindettep, kóptegen otandastarymyzdyń turmys sapasyn nege jaqsarta almaımyz?», - degen edi Prezıdent Q. Toqaev Joldaýynda.

Prezıdenttiń baspasóz hatshysy Berik Ýálı turǵyn úı zańnamasyna jáne QR Sáýlet, qala qurylysy jáne qurylys qyzmeti týraly zańnamaǵa ózgerister engizý jumystary bastalǵanyn habarlady.

«Aýylda jalǵa beriletin úıler salý boıynsha jumys berýshilerdiń shyǵyndaryn sýbsıdııalaý qaǵıdalarynyń jobasy ázirlendi. Úı paıdalanýǵa berilgennen keıin jumys berýshiler shyǵyndarynyń jalpy qunynyń 50 paıyzyn, ıaǵnı 1 sharshy metriniń quny 100 myń teńgeden aspaıtyn, jalpy aýdany 100 sharshy metrden aspaıtyn mólsherde sýbsıdııalaýǵa jatady. Turǵyn úı jumys berýshi men qyzmetker arasynda 5 jyldyq merzimge jasalǵan eńbek sharty jasalǵanda beriledi», - dep jazdy B. Ýálı Facebook -tegi paraqshasynda.